Bugun O‘zbekiston davlat san’at va madaniyat instituti teatr sana’ti fakulteti dramatik teatr va kino aktyorligi ta’lim yo‘nalishi 4-bosqich talabalarining «Taqdir sinovlari» deb nomlangan diplom spektakli bo‘lib o‘tdi.
Taniqli dramaturg Qo‘chqor Norqobil asari asosida O‘zbekiston xalq artisti, professor Erkin Komilov tomonidan sahnalashtirilgan spektakl tomoshasi unga yig‘ilgan barchaga birdek manzur bo‘ldi.
Tadbir so‘ngida institut rektori v.b. Eldor Shermanov sahna asari yaralishida hissa qo‘shgan barchaga minnatdorchilik bildirdi.
«Bugungi spektakl barchaga manzur keldi, deb o‘ylayman. Kichik guruhning shunday katta asarga qo‘l urgani tahsinga loyiq. Shu jumladan, sahnalashtiruvchi rejissyor, ustoz Erkin Komilovga alohida tashakkur izhor qilmoqchiman. Har bir davrning o‘z qahramonlari bo‘ladi. Erkin Komilov — biz uchun hamisha qahramon», — dedi rektor.
Shu bilan birga, spektaklda o‘z roli, dialogi va ijro mahorati bilan ajralib turgan talabalar moddiy mukofot bilan taqdirlanadigan bo‘ldi.
