➡️ Bugun O‘zbekiston davlat san’at va madaniyat instituti rektori, professor Nodirbek Sayfullayev institutda talabalarni turar joy bilan ta’minlash yuzasidan olib borilayotgan ishlar hamda Mustaqilligimizning 33 yilligi va joriy o‘quv yilida talabalikka tavsiya etilgan 1-bosqich talabalarini qutlash maqsadida “Biz bir-bo‘lsak yagona xalqmiz, birlashsak Vatanmiz!” shiori ostida o‘tkazilishi rejalashtirilgan ma’naviy-ma’rifiy tadbirga tayyorgarlik jarayonini yana bir bor ko‘zdan kechirdi.
➡️ Rektor avvalo, talabalarni turar jory bilan ta’minlash markazlari (infokiosk) faoliyati bilan tanishdi. Jarayonda farzandini Talabalar turar joyiga joylashtirish uchun kelgan ota-onalar bilan suhbatlashdi. Suhbat davomida ota-onalar institutda kasbiy (ijodiy) imtihonlarning adolatli va shaffof tashkil etilganini alohida ta’kidlab, buning uchun minnatdorchilik bildirib o‘tdi. Shuningdek, farzandlarini turar joy bilan ta’minlash ishlari va talabalar turar joylaridagi sharoitlar ham ularga ma’qul kelganini aytib o‘tishdi.
➡️ Shundan so‘ng talabalar turar joylariga tashrish buyurib talabalar uchun yaratilgan sharoitlarni ko‘zdan kechirdi hamda talabalar bilan suhbat qurdi. Suhbat asnosida institut rektori bugun yurtimizda yoshlarga о‘z iste’dodlarini namoyon qilishlari hamda о‘z kasbining yetuk mutaxassisi bо‘lishlari uchun barcha imkoniyatlar yaratib berilganini, shu barobarda, institut xodimlari ham talabalar uchun barcha sharoitlarni yaratib berish uchun tinimsiz izlanishda ekanligini aytib o‘tdi.
➡️ Shuningdek, yangi oʻquv yilida talabalarni turar joy bilan ta’minlash ishlarini adolatli va shaffof tarzda olib borish, belgilangan reglamentga qat’iy amal qilish, birorta talaba eʼtiborsiz qolmasligi, buning uchun bor imkoniyatni ishga solish kerakligi qayd etilib, barcha mas’ullarga ushbu masalani hal qilishda mavjud imkoniyatlardan samarali foydalanish hamda talaba-yoshlarning ta’lim olish bilan birga o’z ustida ishlashi va dam olishi uchun yetarli sharoitlarni yaratish bo‘yicha zarur koʻrsatmalar berildi.
➡️ Ertaga bo‘lib o‘tishi rejalashtirilgan bayram tadbiri borasida fikr bildirar ekan Nodirbek Sayfullayev avvalo, ushbu bayram tadbirini talabalarning qiziqishlaridan kelib chiqib tashkil etish, birinchi bosqich talabalariga xush kayfiyat ulashish hamda talabalik baxtidan faxrlanish tuyg‘usini singdirish birinchi darajali vazifa ekanligini ta’kidladi.