Bugun O‘zbekiston davlat san’at va madaniyat institutida Madaniyat vazirining birinchi o‘rinbosari Bahodir Ahmedov malaka oshirish tarmoq markazida tahsil olgan vazirlik tasarrufidagi madaniyat boshqarmalari rahbarlari bilan uchrashdi.
Uchrashuv davomida mamlakatimizda amalga oshirilayotgan islohotlar, sohadagi yutuq va kamchiliklar to‘g‘risida fikr bildirilib, bu borada vazirlik tizimidagi oliy ta’lim muassasalari hamda madaniyat boshqarmalarining o‘rni e’tirof etildi.
«O‘zbekiston davlat san’at va madaniyat instituti avvalgiga qaraganda ancha yaxshi tarafga o‘zgaragan. Xalqaro aloqalar nihoyatda jadallashgan. Buning uchun institut rahbariyatiga vazirlik nomidan minnatdorchilik bildiraman», — dedi Bahodir Ahmedov.
Shu bilan birga, institut rektori v.b. Eldor Shermanov vazirlik rahbariyati va markazda malaka oshirgan boshqarma boshliqlariga o‘z tashakkurini bildirdi.
Tadbir davomida O‘zbekiston davlat san’at va madaniyat instituti qoshida tashkil etilgan malaka oshirish tarmoq markazida tahsil olgan boshqarma boshliqlari sertifikat bilan taqdirlanib, ularga minnatdorchilik bildirildi.
