Yaponiyaning Shinshu universiteti professori san’at fakulteti professori Akiko Kitamura O‘zbekiston davlat san’at va madaniyat institutiga tashrif buyurdi.
Shinshu universiteti haqida
Shinshu universiteti sakkiz fakultetni (san’at, ta’lim, iqtisodiyot va huquq, fan, tibbiyot, muhandislik, qishloq xo‘jaligi hamda to‘qimachilik fanlari va texnologiyasi) o‘z ichiga olgan milliy ta’lim dargohi hisoblanadi.
Matsumoto, Nagano, Ueda va Ina shaharlarida universitetning beshta kampusi joylashgan va u yerda keng ko‘lamli tadqiqotlar olib boriladi. Mazkur oliygohda 1100 dan ortiq professor-o‘qituvchilar 11000 nafarga yaqin talabaga (shu jumladan, 360 nafar xalqaro talaba) saboq beradi.
Universitet Yaponiyadagi oliygohlar ichida 18-o‘rinda turadi. U.S. News & World Report nashrinig ma’lumotlariga ko‘ra, dunyodagi eng yaxshi universitetlar reytingida 708-o‘rinni egallagan.
Tashrif davomida Kitamura O‘zbekiston haqidagi taassurotlari haqida fikr bildirdi.
“Avvalo, vaqt ajratganiningizdan mamnunman. Men 10 yil mobaynida, asosan, Yevropa mamlakatlarida faoliyat olib bordim. Biroq ushbu o‘lkalarda Osiyo madaniyatiga oid elementlarni deyarli uchratmadim. Shu bois, keyinchalik osiyolik san’at vakillari bilan hamkorlik qilishga qaror qildim. Men Yaponiya hukumatining madaniy aloqalar bo‘yicha rasmiy vakiliman. O‘zbekistonga birinchi bor tashrif buyurishim. Yaqin-yaqingacha pandemiya sababli birorta mamlakatga bora olmasdan, faqatgina onlayn tarzda hamkorlik qildim. Taniganlarim orasida Axror baxshi va yana ko‘pgina o‘zbekistonliklar bor. O‘zbekistonni tanlaganimning sababi, bu o‘lka madaniyati xilma-xillikdan iborat ekanligidadir. Kelgusida o‘zaro hamkorlik qilishni rejalashtirganman. Shaxsan o‘zim amaliyot bilan ko‘proq shug‘ullanaman va o‘zbekistonliklar bilan o‘zaro tajriba almashish tarafdoriman”, dedi Shinshu universiteti professori.
Tashrif davomida Akiko Kitamura institutning o‘quv teatri bilan yaqindan tanishdi hamda Tetar san’ati talabalari bilan uchrashdi. Uchrashuv so‘ngida o‘zaro hamkorlik qilish masalalari bo‘yicha kelishuvga erishildi.
