Turk dunyosi filmlar festivalining Oʻzbekistonni taqdirlashga bagʻishlangan anjumani boʻlib oʻtdi

Bugun Oʻzbekiston davlat sanʼat va madaniyat institutida Turk dunyosi filmlar festivalining Oʻzbekistonni taqdirlashga bagʻishlangan anjumani boʻlib oʻtdi. Unda institut rahbariyati, professor oʻqituvchilar hamda iqtidorli talabalar ishtirok etdi.

Ushbu tadbirni Ilmiy ishlar va innovatsiyalar bo’yicha prorektor Sobir Jumayev ochib berdi hamda mazkur festival ikki davlat oʻrtasidagi doʻstona aloqalardan darak berishini ta’kidladi.

Soʻngra Turkiya Jurnalistlar uyushmasi raisi Menderes Demir soʻzga chiqib, Oʻzbekistonda istiqomat qilayotgan fuqarolarning madaniyati bilan boshqa davlatlarni tanishtirish, turkiy davlatlar oʻrtasidagi hamkorliklikni yanada rivojlantirish toʻgʻrisida fikr bildirdi.

Anjuman davomida Turkiya Jurnalistlar uyushmasi raisi tomonidan ushbu fesvtivalni tashkil etishda bergan ko’magi va hamkorligi uchun O’zbekiston davlat san’at va madaniyat instituti rektori, filologiya fanlari doktori, professor Ibrohim Yuldashev va “Ovoz rejissyorligi va operatorlik mahorati” kafedrasi mudiri, S.f.d (Phd), professor v.b Iqboljon Meliqo’ziyevlarga maxsus diplom va esdalik sovg’alari taqdim etildi.

Shuningdek, ushbu festivalda munosib ishtirok etgan “Shermuhammadbek jasorati” filmining rejissori Nabi Abdurazzoqov ham taqdirlandi.

Anjuman soʻngida “Shermuhammadbek jasorati” filmi namoyish etildi.

Maʼlumot uchun, 12-16-oktabr kunlari Turkiyada “9 oʻlka, 9 shahar, 1 festival” nomi ostida 7-hujjatli filmlar festivali oʻtkazildi. Unda Turkiya, Oʻzbekiston, Ozarbayjon, Bosniya va Gersigovina, Qozogʻiston, Qirgʻiziston, Makedoniya, Vengriya, Kipr mamlakatlari tomonidan suratga olingan filmlar ishtirok etdi.

Ushbu festivalda “Kino va televediniye rejissyorligi” mutaxassisligining 2-bosqich magistranti Shokir Xoliqovning “Bahorsiz umr” filmi Turk dunyosining faxriy mukofotiga loyiq ko‘rildi.