9-sentyabr kuni Oʻzbekiston davlat sanʼat va madaniyat institutida yangi oʻquv yilida talabalarni turar joy bilan taʼminlash masalasida yigʻilish oʻtkazildi. Unda institut rektori, professor Ibrohim Yuldashev, professor-oʻqituvchilar va xodimlar ishtirok etdi.

Yigʻilish davomida bir qator dolzarb masalalar ilgari surildi. Jumladan, Oliy va oʻrta maxsus taʼlim vazirligi tomonidan amalga oshirilayotgan islohotlarni mazkur oliygohda tatbiq etish ishlari amalga oshirilayotgan taʼkidlandi. Hozirga kelib, Oʻzbekiston davlat sanʼat va madaniyat institutining talabalar turar joyiga chin yetim, nogironligi bor hamda “Yoshlar daftari” va “Temir daftar”da turadigan talabalarning 96.4 foizi joylashtirildi.

Shuningdek, kelgusida 400 kishiga moʻljallangan yangi talabalar turar joyi qurilib, foydalanishga topshirilishi rejalashtirilmoqda. Ijara uylarga joylashadigan talabalar monitoring tarzda nazorat qilib boriladi hamda ularga ijara haqining 50 foizi toʻlab berilishi aytib oʻtildi.

Bundan tashqari, talabalar tomonidan kontrakt toʻlovlarini oʻz vaqtida toʻlanishi uchun tegishli chora-tadbirlar amalga oshirish; darslarni oʻquv jadvali boʻyicha tartib asosida tashkil qilish hamda Ta’lim sifatini nazorat qilish bo’limi tomonidan doimiy monitoring amalga oshirilishi belgilandi.

Yigʻilish soʻngida masʼul xodimlarga topshiriqlar berildi.