Bugun O‘zbekiston davlat san’at va madaniyat institutida yangi o‘quv yilidagi dastlabki kun bayram shukuhi ila boshlandi. Mazkur ilm dargohiga tashrif buyurgan birinchi bosqich talabalari hamda ularning ota-onalari milliy kuylar sadolari ostida kutib olindi.
“Nevaram O‘lmasboyev Shahzodbek “Estrada aktyorligi” yo‘nalishi talabasiga aylandi. Bundan benihoya xursandman. Kelgusi uning yurtga xizmati tegadigan inson bo‘lishini istayman”, dedi 1-bosqich talabasi Shahzodbekning buvisi.
Institut hududida ajoyib bayram dasturi tashkil etildi.
Unda dastlab, O‘zbekiston oliygoh rektori, professor Ibrohim Yuldashev so‘z olib, imtihonlardan muvaffaqiyatli o‘tgan talabalarni muborakbod etdi hamda ularga omad tiladi.
“Prezidentimiz ta’lim sohasiga alohida e’tibor qaratmoqda. Biz ushbu islohotlarning ijrochilarimiz. Joriy yilgi imtihonlarni shaffof tarzda o‘tkazdik. Barcha talabalarni ushbu sinovlardan muvaffaqiyatli o‘tgani bilan tabriklayman! Bugungi yoshlar Yangi O‘zbekistonni bunyod etishadi. Biz barcha shart-sharoitlarni yaratishga tayyormiz, talabalardan faqatgina ilm olib, Vatani hamda ota-onasi orzu qilgan farzand bo‘lib yetishish talab etiladi. Bizning oliygohda ta’lim bilan bir qatorda tarbiya ham uzviy ravishda olib boriladi. Ortingizdan ota-onangizga tashakkurnomalar borishini tilab qolaman. Barcha birinchi bosqich talabalarini yana bir bor tabriklayman”, dedi Ibrohim Yuldashev.
Shundan so‘ng oliygohga yuqori ball bilan kirgan talabalar tashakkurnomalar va esdalik sovg’alari bilan taqdirlandi.
“Bugun hayotimda unutilmas kun bo‘lib qoldi. O‘zbekiston davlat san’at va madaniyat institutiga grant asosida talaba sifatida qabul qilindim. Xudo xohlasa, san’at sohasiga o‘z hissamni qo‘shmoqchiman. Institut muhiti, ajoyib, har burchagidan ijod muhiti ufurib turadi. Kelajakda xalqimizning suyukli san’atkori bo‘lishga harakat qilaman” dedi Mashrabjonov Hojiakbar.
“Ushbu oliygoh talabasiga aylanganimdan juda xursandman. Dastlabki o‘quv kunidanoq tabriknomaga sazovor bo‘ldik. Yuqori ball bilan o‘qishga qabul qilinganligimiz sababli rektorimizdan tabrik va sovg‘alar qabul qilib oldik. imtihonga tayyorgarlik juda qiyin bo‘ldi. Muhimi, ilk maqsadimga erishdim. Endilikda yaxshi o‘qib, Prezident stipendiyasi sohibiga aylanishga harakat qilaman”, dedi Kutubxona-axborot faoliyati fakulteti 1-bosqich talabasi Rustamova Sohiba.
“Kutubxona-axborot faoliyati fakultetiga 114 ball bilan qabul qilindim. Bundan xursandman. Institut menga juda yoqdi. Oltinchi yil deganda, talaba bo‘lish baxtiga muyassar bo‘ldim. Kelgusida magistratura sohasida ham tahsil olishga harakat qilaman”, dedi Mustafoyeva Mahliyo.
Bayram dasturi kuy-qo‘shiqlar bilan davom ettirildi. Shundan so‘ng birinchi bosqich talabalari Mustaqillik darsiga yo‘l olishdi.
