Bugun Oʻzbekiston davlat sanʼat va madaniyat institutida Jinoyat ishlari boʻyicha Mirzo Ulugʻbek tumani sudyasi Berdiyev Bahrom ishtirokida jinoyatchilik va korrupsiyaga qarshi kurashish mavzusida yigʻilish oʻtkazildi.

Yigʻilish davomida Berdiyev Bahrom institutda jinoiy ish sodir qilishning oldini olish masalasida fikr bildirdi.

“Biz nima uchun bu yerga tashrif buyurdik? Bundan ancha vaqt ilgari talabalar oʻrtasida mushtlashuv sodir boʻlgandi. Bu voqea hatto ijtimoiy tarmoqlarda ham tarqaldi. Bu, albatta, yoqimsiz holat. Ushbu oliygohda turfa ijodkorlar yigʻiladi. Talabalarni nazorat qilish imkonsiz. Lekin bu bizga bahona boʻla olmaydi. Afsuski, baʼzida koʻngilsiz voqealar sodir boʻladi. Qay birimizningdir xatomiz bunga sabab boʻlishi mumkin. Yosh avlodga toʻgʻri taʼlim-tarbiya beraylik. Sizlarning eng katta vazifalaringizdan biri shu”, dedi tuman sudyasi.

Yigʻilish davomida institut xodimlari oʻzlarini qiziqtirgan savollarga javob olishdi hamda jinoyatchilikning oldini olishga qaratilgan chora-tadbirlar kuchaytirilishi borasida kelishib olindi.