2026-yil 27–30-iyul kunlari O‘zbekiston davlat san’at va madaniyat instituti rasmiy delegatsiyasi Belarus Respublikasida xizmat safarida bo‘ldi. Mazkur tashrif O‘zbekiston Respublikasi Prezidenti Shavkat Mirziyoyevning Belarus Respublikasiga amalga oshirgan rasmiy tashrifi hamda O‘zbekiston Respublikasi madaniyat vaziri Ozodbek Nazarbekov boshchiligidagi delegatsiyaning muzokaralari davomida erishilgan kelishuvlarning amaliy davomi sifatida tashkil etildi.

Xizmat safaridan ko‘zlangan asosiy maqsad ta’limni raqamli transformatsiya qilish, madaniyat sohasida zamonaviy axborot texnologiyalari va sun’iy intellekt yechimlarini joriy etish bo‘yicha Belarusning ilg‘or tajribasini o‘rganish, oliy ta’lim muassasalari o‘rtasidagi hamkorlikni kengaytirish hamda qo‘shma ta’lim va ilmiy loyihalarni yo‘lga qo‘yishdan iborat bo‘ldi.

Institut delegatsiyasi tarkibida Raqamli ta’lim texnologiyalari markazi boshlig‘i Maksim Savochkin hamda “Axborot texnologiyalari” kafedrasi mudiri, texnika fanlari doktori (DSc), dotsent Aziza Kurbanova ishtirok etdi. Tashrifda O‘zbekiston Respublikasi Madaniyat vazirligi Raqamlashtirish va sun’iy intellektni rivojlantirish boshqarmasi boshlig‘i Jasurbek Shermuhammedov ham qatnashdi.

Xizmat safari davomida delegatsiya Belarus davlat madaniyat va san’at universiteti, A.K. Glebov nomidagi Minsk davlat badiiy kolleji hamda Belarus davlat informatika va radioelektronika universiteti (BGUIR) faoliyati bilan yaqindan tanishdi.

Belarus davlat madaniyat va san’at universitetida delegatsiyani universitet rektori Natalya Karchevskaya, o‘quv ishlari bo‘yicha prorektor Svetlana Shparlo, ilmiy ishlar bo‘yicha prorektor Yelena Korsakova, xalqaro aloqalar bo‘limi boshlig‘i Vadim Samatiya, o‘quv-uslubiy bo‘lim boshlig‘i o‘rinbosari Yelena Kiseleva, axborot texnologiyalari va texnik o‘qitish vositalari bo‘limi boshlig‘i Igor Levin hamda madaniyat sohasida axborot texnologiyalari kafedrasi mudiri Tatyana Jilinskaya kutib oldilar.

Delegatsiya universitetning Sport va madaniyat markazi, muzeyi, kutubxonasi hamda zamonaviy kompyuter auditoriyalarini ko‘zdan kechirib, ta’lim va ilmiy infratuzilma, talabalar uchun yaratilgan shart-sharoitlar hamda raqamli ta’limni tashkil etish bo‘yicha ilg‘or tajriba bilan yaqindan tanishdi. Muzokaralar davomida ta’limni raqamlashtirish, madaniyat sohasi uchun zamonaviy mutaxassislarni tayyorlash, o‘quv jarayoniga axborot-kommunikatsiya texnologiyalari va sun’iy intellektni joriy etish masalalari muhokama qilindi. Tomonlar professor-o‘qituvchilar va talabalar almashinuvi, yozgi maktablar, stajirovkalar, qo‘shma ilmiy-amaliy konferensiyalar hamda boshqa ta’lim va ilmiy loyihalarni amalga oshirish istiqbollarini ham ko‘rib chiqdilar.

Kunning ikkinchi yarmida delegatsiya A.K. Glebov nomidagi Minsk davlat badiiy kollejiga tashrif buyurdi. Kollej direktori Aleksandr Shantarovich hamda o‘qituvchi Yuliya Sergeyeva delegatsiya a’zolarini o‘quv auditoriyalari, ixtisoslashtirilgan ustaxonalar va ijodiy laboratoriyalar bilan tanishtirdilar. Ayniqsa, grafik dizayn, multimedia dizayni, animatsion dizayn yo‘nalishlari bo‘yicha mutaxassislar tayyorlash tizimi, badiiy ta’limda zamonaviy raqamli texnologiyalardan foydalanish hamda amaliyotga yo‘naltirilgan ta’lim modeli delegatsiyada katta qiziqish uyg‘otdi.

29-iyul kuni delegatsiya **Belarus davlat informatika va radioelektronika universiteti (BGUIR)**ga tashrif buyurdi. U yerda universitet rektori Vadim Bogush, Ta’lim xizmatlarini ilgari surish markazi boshlig‘i Andrey Ushkurov hamda Masofaviy ta’limni rivojlantirish markazi boshlig‘i o‘rinbosari Anna Tereshkova bilan uchrashuv bo‘lib o‘tdi.

Uchrashuv davomida tomonlar raqamli ta’limni rivojlantirish, yuqori malakali mutaxassislarni tayyorlash, akademik mobillikni kengaytirish hamda ta’lim jarayoniga zamonaviy axborot texnologiyalari va sun’iy intellekt yechimlarini joriy etish bo‘yicha tajriba almashdilar. O‘zbekiston davlat san’at va madaniyat instituti delegatsiyasida BGUIRning elektron marketing, raqamli marketing, axborotni boshqarish tizimlari, sun’iy intellekt hamda axborot tizimlari va texnologiyalari (o‘yin industriyasida axborot tizimlari va texnologiyalari) yo‘nalishlari alohida qiziqish uyg‘otdi.

Belarus tomoni professor-o‘qituvchilarni tayyorlash, talabalar stajirovkalarini tashkil etish, qo‘shma ta’lim dasturlarini ishlab chiqish, ilmiy-amaliy tadbirlarni o‘tkazish hamda qo‘shma ilmiy va ta’lim loyihalarini amalga oshirishda har tomonlama hamkorlik qilishga tayyor ekanligini bildirdi. Bu esa O‘zbekiston davlat san’at va madaniyat instituti uchun ta’lim jarayonini raqamli transformatsiya qilish, zamonaviy IT yechimlarini joriy etish va xalqaro tajribani amaliyotga tatbiq etish borasida muhim imkoniyatlarni yaratadi.

Xizmat safari yakunlari O‘zbekiston davlat san’at va madaniyat instituti uchun Belarusning yetakchi oliy ta’lim muassasalari bilan hamkorlikni yanada mustahkamlash, professor-o‘qituvchilar va talabalar almashinuvini rivojlantirish, qo‘shma ta’lim dasturlari hamda ilmiy loyihalarni amalga oshirish bo‘yicha yangi istiqbollarni ochib berdi. Eng muhimi, ushbu tashrif O‘zbekiston va Belarus o‘rtasida davlat rahbarlari hamda ikki mamlakat madaniyat sohasidagi idoralar darajasida erishilgan kelishuvlarning amaliy ijrosini ta’minlash yo‘lidagi navbatdagi muhim qadam bo‘ldi.

“Madaniyatlararo integratsiyani kuchaytirishda ijodkorlik va ijrochilik masalalari” mavzusidagi xalqaro ilmiy-amaliy anjuman bo‘lib o‘tdi

Mazkur anjuman O‘zbekiston Respublikasi Oliy ta’lim, fan va innovatsiyalar vazirligi, O‘zbekiston Respublikasi Madaniyat vazirligi hamda O‘zbekiston davlat san’at va madaniyat instituti hamkorligida tashkil etildi.

Xalqaro ilmiy-amaliy anjumanda oliy ta’lim muassasalari, ilmiy markazlar, madaniyat va san’at tashkilotlari vakillari bilan bir qatorda Rossiya, Turkiya, Xitoy, Ozarbayjon, Janubiy Koreya va Tojikiston kabi davlatlardan nufuzli professor-o‘qituvchilar, taniqli olimlar hamda soha mutaxassislari ishtirok etdi.

Anjumanning asosiy maqsadi – madaniyatlararo muloqot va integratsiya jarayonlarida ijodkorlik hamda ijrochilikning o‘rni va аhamiyatini ilmiy-amaliy jihatdan tahlil qilish, turli xalqlarning badiiy-estetik tajribalarini qiyosiy asosda o‘rganish hamda globallashuv sharoitida madaniy hamkorlikni rivojlantirishning istiqbolli yo‘nalishlarini belgilashdan iborat bo‘ldi.

Dastlab anjumanda O‘zbekiston Respublikasi Madaniyat vazirining birinchi o‘rinbosari Avazxon Tadjixanov hamda institut rektori Nodirbek Sayfullayevning ishtirokchilarga yo‘llagan tabrik so‘zlari o‘rin oldi.

Shuningdek, yalpi majlisda Sergey Zengin (Rossiya), Mücahit Demir (Turkiya), Wang Jianhui, Xu Ran (Xitoy), Narmin Garalova, Sevil Kerimova (Ozarbayjon), Alisher Amini (Tojikiston) hamda Jin-Hwan Ra (Janubiy Koreya) kabi xorijiy ekspertlarning ma’ruzalari tinglandi.

Anjuman davomida madaniyatlararo integratsiya jarayonida ijodkorlik fenomenining ilmiy asoslari, an’anaviy va zamonaviy san’at shakllarining o‘zaro ta’siri, folklor va musiqa san’atidagi zamonaviy tendensiyalar, milliy o‘zlikni saqlash hamda madaniy xilma-xillikni qo‘llab-quvvatlash masalalari atroflicha muhokama qilindi.

Shuningdek, ochiq muloqot va ilmiy bahslar davomida madaniy hamkorlikni rivojlantirish, ijodiy almashinuvni kuchaytirish hamda xalqaro ilmiy integratsiyani kengaytirishga qaratilgan qator taklif va tavsiyalar ilgari surildi.

Joriy yilning 24-fevral kuni Hurmatli Prezidentimiz Shavkat Mirziyoyev boshchiligida yoshlar bilan o‘tkazilgan ochiq va samimiy muloqot mamlakatimiz taraqqiyotida mutlaqo yangi bosqichni boshlab berayotgan tarixiy voqea bo‘ldi, desak mubolag‘a bo‘lmaydi.

Unda ilgari surilgan tashabbuslar – ta’lim, kasb-hunar, tadbirkorlik, innovatsiya va volontyorlik yo‘nalishlaridagi aniq va tizimli qarorlar – 22 milliondan ortiq yoshlarimizning ulkan salohiyatini ro‘yobga chiqarishga xizmat qiladi.

Davlatimiz Rahbari yoshlar – bu nafaqat demografik ustunlik, balki iqtisodiy, ijtimoiy va ma’naviy taraqqiyotning bosh omili ekanligiga alohida e’tibor qaratdi. Ayniqsa, jahon olimpiadalaridagi yutuqlar, TOP universitetlarda tahsil olayotgan o‘g‘il-qizlarimiz, xalqaro bozorga chiqqan startaplar va sport sohasidagi g‘alabalar – bularning barchasi yurtimizda yaratilgan imkoniyatlar samarasidir.

O‘zbekiston davlat san’at va madaniyat instituti jamoasi ushbu ishonch va e’tiborni yuksak mas’uliyat sifatida qabul qiladi.

Biz uchun yoshlarning nafaqat kasbiy, balki ma’naviy-estetik tafakkurini shakllantirish, ularni milliy va umuminsoniy qadriyatlarga hurmat ruhida tarbiyalash ustuvor vazifadir.

Prezidentimiz tomonidan ilgari surilgan “Kelajak tadbirkori” dasturi, “Yangi avlod tadbirkorlari” tashabbusi, “Yoshlar biznes inkubatori” markazlari, “Oʻsish va rivojlanish (Upshift)” loyihasi, volontyorlik harakatini keng qo‘llab-quvvatlash kabi tashabbuslar ta’lim muassasalari oldiga ham yangi vazifalarni qo‘ymoqda.

O‘zbekiston davlat san’at va madaniyat instituti jamoasi ham ushbu tashabbuslarni ijrosini ta’minlashni, shubhasiz, eng ustubor vazifa etib belgiladi.

Shu boisdan ham kelgusida talabalarni amaliy loyihalar asosida o‘qitish, kreativ industriyalar, madaniy menejment va san’at tadbirkorligi yo‘nalishlarini kuchaytirish, dual ta’lim elementlarini keng joriy etish, yosh ijodkorlar va startap tashabbuskorlarini qo‘llab-quvvatlash bo‘yicha aniq chora-tadbirlar ishlab chiqish va amalga oshirishni reja qildik.

Ta’kidlash o’rinliki, institutimiz kafedralarining ish beruvchi tashkilotlarda ayni paytda 4 ta filiali faoliyat olib bormoqda. Bu ishlarni davom ettirish hamda bu asosda dual ta’limni kengatirishni maqsad qilganmiz.

Shuningdek, 4 ta sport federatsiyalari bilan hamkorlik shartnomalari imzolangan bo‘lib, hamkorlikda bir qancha sport va ma’naviy-ma’rifiy tadbirlar tashkil etib kelinmoqda.

Endilikda bu ishlarni ham salmog‘ini oshirish, shuningdek, institutda sport musobaqalarini yanada ko’paytirish borasida ish olib borilmoqda.

Bitiruvchilarni ish bilan ta’minlash borasida ham madaniyat boshqarmalari, teatrlar, kutubxonalar bilan muntazam uchrashuvlar o‘tkazib kelmoqdamiz.

Ayni paytda, olib borilayotgan mazkur ishlar bizdan yanada katta mas’uliyat va tizimli yondashuvni talab etayotganini chuqur anglaymiz.

Hurmatli Prezidentimiz Shavkat Mirziyoyev tomonidan amalga oshirilayotgan keng ko‘lamli islohotlar ta’lim va madaniyat sohasida ham yangicha fikrlash, zamonaviy boshqaruv usullarini joriy etish hamda natijadorlikni ustuvor mezon sifatida belgilash zarurligini ko‘rsatmoqda.
Bu esa bizdan eskicha qarash va qoliplangan yondashuvlardan voz kechib, faoliyatimizni zamon talablari asosida qayta ko‘rib chiqishni, har bir tashabbusni aniq amaliy samaraga yo‘naltirishni taqozo etadi.

Shunday ekan, oldimizda turgan vazifalarni tanqidiy tahlil asosida qayta baholab, yanada yuqori bosqichga olib chiqish ustuvor maqsadimizdir.

Negaki, oliy ta’lim muassasalari oldida ham ko’plab yangi vazifalar turibdi. Xususan, bugun ular faqat bilim beruvchi muassasa emas, balki innovatsiya, tadbirkorlik va yangi ish o‘rinlari yaratuvchi markazga aylanishi lozimligi belgilandi.

Biz ishonamizki, san’at va madaniyat sohasi yoshlar uchun nafaqat ijod maydoni, balki iqtisodiy barqarorlik va innovatsion rivojlanishning muhim drayveriga aylanadi.

Yangi avlod san’atkorlari, menejerlari va ijodiy tadbirkorlari mamlakatimizning xalqaro nufuzini yanada yuksaltiradi.

Prezidentimizning yoshlar bilan muloqoti – bu shunchaki uchrashuv emas, balki har bir rahbar, har bir pedagog va har bir mas’ul shaxs zimmasiga yuklangan aniq vazifa va javobgarlikdir.

Biz ham kelgusi faoliyatimizda, albatta, yoshlarimizni eshitamiz, qo‘llab-quvvatlaymiz va ularning tashabbuslari ro‘yobga chiqishi uchun barcha imkoniyatlarni safarbar etamiz.

Yoshlar – Yangi O‘zbekistonning buguni va kelajagidir.
Ularning muvaffaqiyati – Vatanimiz muvaffaqiyatidir.

Nodirbek Sayfullaev,
O‘zbekiston davlat san’at
va madaniyat instituti rektori,
professor.

Unda dastlab Dovidxonov Mahmudxon Muhriddinxon o‘g‘lining 17.00.07 – Madaniyat nazariyasi va tarixi. Madaniyatshunoslik ixtisosiligi bo‘yicha tayyorlangan “Yangi O‘zbekiston madaniy diplomatiyasining rivojlanish tendensiyalari” mavzusidagi san’atshunoslik fanlari fanlari bo‘yicha falsafa doktori (PhD) ilmiy darajasini olish uchun yozilgan dissertatsiyasi muhokama qilindi.

Ushbu dissertatsiya tarix fanlari doktori, professor Mavrulov Abduxalil Abdulxayevich ilmiy rahbarligida yozildi.

Tadqiqotning ilmiy ahamiyati mustaqillik davri O‘zbekiston madaniy diplomatiyasining tarixiy, xolis va tizimli prinsiplari hamda fanlararo yondashuvlar –  xususan, tarix, siyosatshunoslik va madaniyatshunoslik metodlari asosida yoritilishi orqali metodologik yondashuvlar va nazariy xulosalarni takomillashtirish imkonini beradi. Shu bilan birga, dissertatsiya madaniy diplomatiya konsepsiyasining ilmiy-nazariy asoslarini kengaytiradi va mavzuga oid ilg‘or g‘oyalar, konseptual tushunchalar hamda tizimli tahlilni taqdim etadi.

Tadqiqot natijalarining amaliy ahamiyati madaniyatshunoslik, madaniyat va san’at sohasi menejmenti yo‘nalishlarida malakali kadrlar tayyorlashda nazariy qo‘llanma vazifasini bajaradi. Shuningdek, madaniy diplomatiya masalalariga oid ilmiy nashrlar, tadqiqotlar hamda O‘zbekistonning tashqi siyosatiga doir tahliliy materiallar tayyorlashda muhim manba sifatida xizmat qiladi. Natijalar amaliyotda madaniy diplomatiya strategiyasini rivojlantirish va milliy hamkorlikni kengaytirishda qo‘llanilishi mumkin.

❗️Dissertasiya ishi Ilmiy kengash muhokamasiga tavsiya etildi.

Shundan so‘ng ikkinchi tadqiqodchi Rustamaliyeva Shahnoza Rustamali qizining 17.00.07 – Madaniyat nazariyasi va tarixi. Madaniyatshunoslik ixtisosiligi bo‘yicha tayyorlangan “Oʻzbekistonda xotin-qizlar madaniyati rivojiga ta’sir koʻrsatayotgan ichki va tashqi omillar” mavzusidagi san’atshunoslik fanlari bo‘yicha falsafa doktori (PhD) ilmiy darajasini olish uchun yozilgan dissertatsiyasi muhokama qilindi.

Ushbu dissertatsiya tarix fanlari nomzodi, professor v.b. Nishonboyeva Qunduzxon Vahobovna ilmiy rahbarligida yozilgan.

Tadqiqotning ilmiy ahamiyati xotin-qizlarning ijtimoiy faolligini oshirish, ularning madaniy rivojlanishiga toʻsqinlik qilayotgan omillarni aniqlash va ularni bartaraf etish yoʻllarini izlab topishda ilmiy-nazariy asos yaratadi. Shu bilan birga, ayollarga nisbatan gender tengsizlik, ma’naviy tahdidlar, tazyiq va zoʻravonlik holatlarining ijtimoiy va madaniy ildizlarini oʻrganish orqali jamiyatda insonparvarlik, adolat va madaniy barqarorlik tamoyillarini mustahkamlashga xizmat qiladi.

Tadqiqot natijalarining amaliy ahamiyati madaniyatshunoslik va madaniyat nazariyasiga doir yangi oʻquv qoʻllanma va darsliklar yaratish, oliy ta’lim muassasalarida yangi madaniyatshunos va san’atshunos kadrlarni tayyorlashda muhim manba boʻlib xizmat qiladi.

❗️Dissertasiya ishi Ilmiy kengash muhokamasiga tavsiya etildi.

О‘zbekiston  Respubikasi  Prezidenti Shavkat  Mirziyoyevning  2025-yil  26-dekabr kuni Oliy Majlis hamda О‘zbekiston xalqiga yо‘llagan murojaatnomasining mazmun mohiyatiga muvofiq, 2026-yilda ulug‘ ajdodlarimiz yorqin xotirasini ulug‘lash, ularning ilmiy, ma’naviy-ma’rifiy merosini chuqur tadqiq etish, ulug‘ bobokalonlarimiz tavallud kunlarini munosib о‘tkazish maqsad va vazifa qilib belgilangan edi.

Murojaatnomadagi vazifalarning amaldagi ijrosi о‘laroq, 2026-yil 7-fevral kuni muhtasham Turkiston anjumanlar saroyida Hazrat Mir Alisher Navoiyning 585 yillik tavallud ayyomi munosabati bilan О‘zbekiston davlat san’at va madaniyat institutining professor-о‘qituvchilari, iste’dodli talaba-yoshlari, magistrlar hamda doktorantlardan iborat professional jamoalar ijrosida “Navoiy gulshani – dillar bо‘stoni” deb nomlangan teatrlashtirilgan konsert dasturi namoyish etildi.

Mazkur tadbirning bevosita g‘oya muallifi: institutning rektori, professor Nodirbek Sayfullayev, konsert dasturini sahnalashtiruvchi rejissyor: dotsent Farrux Egamberdiyev bо‘ldi. Ushbu teatrlashtirilgan xotira kechasini kо‘tarinki ruhda, mazmunli о‘tishida institutning barcha rahbar xodimlari-yu, professor-о‘qituvchilaridan tortib, toki institutning talabalarigacha jonbozlik kо‘rsatishdi. Ijrochilar tomonidan har bir sahna chiqishlari Hazrat Navoiyga oshufta kо‘ngillar, uning ash’orlarini sog‘ingan qalblar uchun kо‘tarinki ruhda, olqishlar bilan qarshi olindi.

Tadbir, boshlovchilarning kirish sо‘zlari hamda institut talaba yoshlaridan tarkib topgan orkestr jamoasining “Konsert valsi” (Anor Nazarov) asari bilan ochib berildi. Shundan sо‘ng sahnaga institut tadqiqotchisi Islombek Berdimurodovning Alisher  Navoiy obrazida quyidagi monologi yangradi: “Ey yolg‘izlik bilan ulfat tutingan, uzlatda ulfati hasratu kulfat bо‘lgan! Axir sen mardona ijod qilding, durdona doston yaratding. Hizr kabi zulmat ichra nur sochding,  elning boshidan gavharu dur sochding” kabi nomalar bilan davom ettirildi.

Institut talabalari ijrosidagi har bir sahna asarlari ijrosi (monolog, qо‘shiq va h.) ular uchun katta bilim, kо‘nikma va malaka orttirishlarida beqiyos bilim va ilm manbai bо‘lgan bо‘lsa, Turkiston anjumanlar saroyi sahnasi – talabalardagi imkoniyatlarni, ularning iste’dodlarini yanada rivojlantirishda amaliyot maydoni bо‘lib xizmat qildi.

Institutda faoliyat olib borayotgan Ustoz san’atkorlarning chiqishlari tadbirga yanada fayz va shukuh bag‘ishladi. Institut talabalar orkestri hamda institut professor-о‘qituvchilaridan tashkil topgan “Sayqal” sozandalar ansambli jо‘rligidagi О‘zbekiston xalq hofizi, professor Orolmirzo Safarovning “Sumbulim” asaridagi yuqori pardalardagi nola va qochirimlari; О‘zbekistonda xizmat kо‘rsatgan artist, professor Ahmadjon Dadayevning “Sayqal” ansambli jо‘rligidagi “Qadi Shamshod” asari ijrosidagi о‘ziga xos ijro uslubi; shuningdek, О‘zbekiston xalq hofizi, professor, “Mehnat Shuhrati” ordeni sohibi Soyibjon Niyozovning Dugoh maqomidan Mо‘g‘ulchayi Dugoh ijrosidagi kо‘hna Buxoro maqom ijrochiligiga xos “shiddat” tomoshabinlarda kо‘tarinki kayfiyat bag‘ishladi.

“G‘urbatda g‘arib shodmon bо‘lmas emush” radifli ruboiysi bilan  kichkina Alisher obrazida gavdalangan 49-maktab 1-sinf о‘quvchisi Kuranbayev Nurmuhammadning chiqishi barchaning qalbini junbushga keltirgan bо‘lsa, institut professor-о‘qituvchilari, zabardast sozandalar, Ustoz-muallimlar Komiljon Shermatov (qonun), Komiljon Mirzayev (g‘ijjak), Yusufjon Vohidov (nay)larning о‘zbek milliy sozlarida taralgan badiha (improvizatsiya) ijrolari orkestr jо‘rligidagi “Favvora” asarida – ham akademik ham milliy ijroning mohirona qо‘llanishi tomoshabinlarda hayrat uyg‘otdi, olqishlarga sazovor bо‘ldi.

Sahnada Navoiy siymosi. Uyg‘un va Izzat Sultonlarning “Navoiy” dramasidagi “Navoiy va Guli” badiiy kompozitsiyasi Islom Berdimurodov hamda 3-kurs talabasi Mufassal Shokirovalar ijrosida otashin ishq tuyg‘usining she’riy misralarda, Sharqona ibo, hayo va iffatning yuksak namunasi “Sevgi” sahnasi gavdalandiki, bunda tomoshabin qalbini bedavo – ishq dardi chulg‘adi.

Institut professor о‘qituvchilari tomonidan Navoiy g‘azallariga bog‘langan asarlar ijrosi, xususan, dotsent Azamat Sharipov ijrosida Doni Zokirov musiqasi bilan “Kо‘rmadim”, Usmon Berdiyev ijrosida “Ey sabo” ashulalari, shuningdek, О‘zbekiston xalq hofizi, professor Beknazar Dо‘stmurodov shogirdlar bilan hamnafaslikda “Bо‘lmish” ashulasi; О‘zbekiston xalq artisti,  professor Xayrulla Lutfullayevning “Munojot” ashulasi ijrosi “Sayqal” sozandalar ansambli jо‘rnavozligida, institutning 1-bosqich xoreografiya ta’lim yо‘nalishi talabalari raqsi bilan yanada boyidi.

Dunyoga ochilayotgan Yangi О‘zbekiston, turli tillar va millatlar hamda turlicha an’analar birlashgan zaminda tinch va totuv yashayotgan turli elatlarga Hazrat Navoiy she’riyatini, uning ruboiylarini baxshida qilish, ilinish; turk, rus, ingliz, tojik, qoraqalpoq va о‘zbek tillarida Navoiy g‘azallarini ifodali о‘qish bо‘yicha Teatr san’ati fakulteti talabalari ijrosidan gо‘zal chiqishlar tinglandi. Shuningdek, sun’iy intellekt yordamida “Axborot texnologiyalari” kafedrasi mudiri Aziza Qurbоnova tomonidan katta ekranga moslab yaratilgan “Navoiy monologi” kо‘rinishi institutning zamonaviy texnologiyalar bilan hamnafas odimlayotganidan dalolat beradi.

Alisher Navoiy sо‘zlariga yozilgan barcha kuy, qо‘shiq, ashula va maqom asarlari jonli ijroda namoyish etildi. Turkiston anjumanlar saroyiga tashrif buyurgan barcha tomoshabinlar gо‘yoki, Navoiy davridan gо‘zal hislarni  tuygandek taаssurot оldilar. Konsert yakunidagi “Jon О‘zbekiston” qо‘shig‘i institut professor- о‘qituvchilaridan Anvar Mirzayev, Dilyoraxon Kavilova, Nasiba Sodiqova va barcha konsert ishtirokchilari tomonidan bir maqsad, bir fikr tarzida, mushtaraklikka, birdamlikka xos tarzda birga kuylandi.

G‘anijon XUDOYEV,
О‘zDSMI professori v.b., falsafa doktori (PhD)

O‘zbekiston davlat san’at va madaniyat instituti rektori, professor Nodirbek Sayfullayev rahbarligida institut Kengashining navbatdagi yig‘ilishi bo‘lib o‘tdi.

Yig’ilish avvalida institutda ko‘p yillik samarali ilmiy-pedagogik faoliyati, fidokorona mehnati hamda san’at va madaniyat sohasi rivojiga qo‘shgan munosib hissasi, shuningdek, tavallud ayyomi munosabati bilan “San’atshunoslik va madaniyatshunoslik” kafedrasi professori Sabohat Haytmatova hamda “Dramatik teatr va kino san’ati” kafedrasi mudiri v.b. Zamfira Axmedovalar e’tirof etilib,
institut rektori tomonidan ularga tashakkurnoma va esdalik sovg‘alari topshirildi.

Sundan so’ng yig’ilish kun tartibidagi masalalarga otilib, quyidagilar yuzasidan mutasaddilarning axborotlari tinglandi.

Jumladan, 2025/2026-o‘quv yilida rivojlantirishning maqsadli ko‘rsatkichlariga asosan (o‘quv, ilmiy, ma’naviy-ma’rifiy ishlar yuzasidan) amalga oshirilgan ishlar;
– 2025/2026-о‘quv yili birinchi yarim yillik yakunlari (yakuniy nazorat natijalari);

– talabalarning malakaviy amaliyotini samarali tashkil etish xususida О‘zbekiston Respublikasi Vazirlar Mahkamasining 2019-yil 23-sentabrdagi “Oliy ta’lim muassasalari rahbar va pedagog kadrlarning malakasini oshirish bо‘yicha qо‘shimcha chora-tadbirlar tо‘g‘risida”gi
797-sonli qarorining institutdagi ijrosi;

– ilmiy unvon olish uchun Oliy attestatsiya komissiyasiga hujjatlarni yuborish;
– 2026-yil uchun maqsadli investitsiyalar hamda xalqaro hamkorlik masalalari bo‘yicha kafedralar kesimida rejalashtirilgan vazifalar;
– Ta’lim sifatini nazorat qilish bo‘limining 2026-yil ish rejasini tasdiqlash, shuningdek, ijro intizomi kabi turli masalalar muhokama qilindi.

📌 Kengash yig’ilishi so’ngida barcha mas’ullarga kun tartibidagi masalalar bo’yicha tegishli topshiriqlar berildi.

Poytaxtimizdagi “Renessans Hall” konsert zalida “Yangi O‘zbekiston yulduzlari” madaniyat va san’at milliy mukofoti g‘oliblarini taqdirlash marosimi bo‘lib o‘tdi.

Ushbu nufuzli tadbir doirasida madaniyat va san’at sohasida fidokorona mehnat qilib kelayotgan, yuksak ijodiy natijalarga erishgan ijodkorlar va soha vakillari munosib e’tirof etildi.

Mazkur marosimda O‘zbekiston davlat san’at va madaniyat instituti “San’atshunoslik va madaniyatshunoslik” kafedrasi dotsenti, taniqli dramaturg Qo‘chqor Norqobil “Yilning eng yaxshi dramaturgi” nominatsiyasi g‘olibi deb topildi.

Ushbu mukofot hamkasbimizning milliy dramaturgiya rivojiga qo‘shayotgan salmoqli hissasi, samarali ijodiy faoliyati hamda yosh avlodni tarbiyalash yo‘lidagi ko‘p yillik mehnatlarining munosib e’tirofi bo‘ldi.

Shu munosabat bilan, institutimiz jamoasi va o’zim nomimdan Qo‘chqor Norqobilni ushbu e’tirof bilan samimiy muborakbod etib, kelgusi ijodiy faoliyatida ulkan yutuqlar tilayman.

Nodirbek Sayfullayev,
O‘zbekiston davlat san’at va madaniyat instituti rektori, professor.

O‘zbekiston davlat san’at va madaniyat institutida 2025/2026-o‘quv yili kuzgi semestrida o‘tilgan fanlar bo‘yicha yakuniy nazorat jarayonlari davom etmoqda.

Ushbu jarayonlarni institut rektori, professor Nodirbek Sayfullayev, shuningdek, professor-o‘qituvchilar bevosita kuzatib borishmoqda.

Xususan, bugun rektor Cholg‘u ijrochiligi ta’lim yo‘nailishi 1-kurs talabalarining “Ansabl sinfi”, Dramatik teatr va kino aktyorligi ta’lim yo‘nalishi 1-bosqich talabalarining “Vokal” fanidan, “Kinoteleopratorlik” ta’lim yo‘nalishi 3-kurs talabalarining “Fotokompozitsiya”, Estrada aktyorligi ta’lim yo’nalishi 2-bosqich talabalarining “Aktyorlik mahorati” fanlaridan yakuniy nazoratlarida ishtirok etdi.

Ta’kidlash joizki, ustozlar tomonidan ayni damda imtihon topshirayotgan talabalarning yutuqlari e’tirof etilishi barobarida, kelgusi ijodi uchun muhim bo’lgan ko’rsatma va tavsiyalar ham berib o’tilmoqda.

Rektor talaba-yoshlar va professor o‘qituvchilar bilan muloqot qilar ekan, bugun yurtimizda san’at va madaniyat rivojiga berilayotgan e’tibor va g’amxo’rlik yuksak darajada ekanligini qayd etib, oldimizda turgan eng muhim vazifa bu imkoniyatlardan unumli foydalanish hamda yurtimiz san’ati rivojiga hissa qo’shish ekanligini ta’kidladi.

Yakuniy nazoratlar barcha ta’lim yo‘nalishlarida belgilangan tartibda davom etmoqda.