Ma’lumki, bugungi kunda yoshlar o‘rtasida kitobxonlikni keng targ‘ib qilish, ularni adabiyot va mutolaaga bo‘lgan qiziqishlarini oshirish yo‘lida amalga oshirilayotgan “Ma’rifat ulashib” loyihasining ahamiyati tobora ortib bormoqda. Ushbu loyiha yoshlarning tafakkurini kengaytirish, ularni o‘qish va o‘rganishga da’vat etishda, shuningdek, milliy g‘oya va qadriyatlarimizni chuqur anglashida muhim omil bo‘lib xizmat qilmoqda.Tobora an’anaga aylanib borayotgan mazkur loyiha doirasida bugun O‘zbekiston davlat san’at va madaniyat institutida navbatdagi ma’rifiy uchrashuv bo‘lib o‘tdi. Tadbirda talaba-yoshlarni adabiyot, ma’rifat va so‘z san’atiga oshno etish, ularda kitob o‘qishga bo‘lgan mehrni kuchaytirish maqsad qilingan.

Tadbirga O‘zbekiston Yozuvchilar uyushmasi a’zosi, yozuvchi, ssenarist, telejurnalist Nazar Eshonqulov, sharqshunos, filologiya fanlari nomzodi, dotsent Abdumajid Azimov, hamda “Shuhrat” medali, “Oltin qalam” milliy mukofoti sohibasi, yozuvchi Xosiyat Rustamovalar taklif etildi.

Dastlab, Institut O‘quv teatrida talaba-yoshlar bilan uchrashuv bo‘lib o‘tdi. Institut rektori, professor Nodirbek Sayfullayev mehmonlarni samimiy kutib olib, institut jamoasi nomidan ularga minnatdorlik bildirdi. U o‘z so‘zida bu kabi ma’naviy-ma’rifiy uchrashuvlar yoshlarning dunyoqarashini boyitish, ularning adabiyot, san’at va madaniyatga bo‘lgan qiziqishlarini oshirishda, shuningdek, o‘qish va fikrlash madaniyatini shakllantirishda katta ahamiyat kasb etishini ta’kidladi.

N.Sayfullayev O‘zbekiston davlat san’at va madaniyat instituti ijodiy oliy ta’lim muassasasi sifatida adabiyot bilan chambarchas bog‘liqligini qayd etdi. Bu yerda faqatgina san’at va madaniyat sohasi vakillari emas, balki yozuvchi va shoirlar ham faoliyat yuritishi, bu esa adabiy muhitni yanada boyitishini ta’kidladi. Shu munosabat bilan u bunday hamkorlik tadbirlari kelgusida ham izchil davom ettirilishini ma’lum qildi.

Shundan sо‘ng institut rahbari mehmonlarga minnatdorlik sifatida tashakkurnomalar va esdalik sovg‘alari taqdim etdi.

Uchrashuv ijodiy, samimiy ruhda davom etdi. Mehmonlar o‘z chiqishlarida adabiyotning inson ruhiy dunyosidagi o‘rni, so‘zning qudrati va kuchi, shuningdek, bugungi efirga uzatilayotgan seriallar, ularning milliy mentalitet va ma’naviyatga ta’siri, yosh avlod ongiga singdirayotgan g‘oyalari haqida fikr almashishdi.

Ijodkorlar so‘zning mas’uliyatini, yozuvchi va jurnalistning xalq, millat, va ayniqsa, yoshlar oldidagi vazifasini alohida ta’kidlashdi. Milliy qadriyatlarimizni, ona tilimizni, madaniyat va o‘zligimizni saqlab qolishda adabiyotning o‘rni beqiyos ekanini qayd etishdi. Yoshlarning qalbida adabiyotga, Vatanga va millatga mehr uyg‘otish bugungi kunda eng muhim vazifalardan biri ekanligi aytib o‘tildi.

Har bir ijodkor uchrashuv davomida millatni ulұg‘lovchi, Vatanni madh etuvchi she’rlaridan namuna о‘qib berdi. Shu onlarda zaldagi talabalar va ustozlar kо‘zlarida ilhom va faxr tuyg‘usi namoyon bо‘ldi.

Tadbir davomida institut o‘qituvchilari va talaba-yoshlar ham о‘z ijodiy namunalarini taqdim etdilar. Ayniqsa, institut professori, taniqli shoira Sayyora Toychiyevaning “Vatan manzumasi” nomli she’ri yig‘ilganlarda chuqur ta’surot qoldirdi. Ushbu she’r yurtimizga bо‘lgan muhabbat, sadoqat va gurur tuyg‘usini yanada yorqin ifodaladi.

Talaba-yoshlarning adabiyot, ijod va mutoalaga oid savollariga mehmonlar atroflicha va samimiy tarzda javob berishdi. Ular har bir yosh qalbda ijod urug‘ini sepish insonning eng ezgu amallaridan biri ekanligini ta’kidlab о‘tishdi.

Shundan so‘ng mehmonlar institut Yoshlar masalalari va ma’naviy-ma’rifiy ishlar bo‘yicha birinchi prorektori Shohbek Ergashev hamrohligida institut faoliyati bilan yaqindan tanishishdi. Ular talaba-yoshlarning ijodiy ishlari, o‘quv jarayonlari va zamonaviy sharoitlar bilan qiziqish bilan tanishdilar.

Xususan, Xalq ijodiyoti fakulteti “Ashula va raqs” ta’lim yo‘nalishi talabalari tomonidan ijro etilgan “Farg‘onacha jonon” va “Nasri uzzol” kuy-qo‘shiqlari, shuningdek, “Dramatik teatr va kino aktyorligi” ta’lim yo‘nalishi 1-bosqich talabalari tomonidan namoyish etilgan mahorat darslari mehmonlarda katta taassurot qoldirdi. Bundan tashqari ular talabalar turar joyi, o‘quv va ijodiy auditoriyalar, zamonaviy texnik jihozlar bilan tanishib, institutdagi imkoniyatlardan mamnun bo‘lishdi.

Eslatib o‘tamiz, kunning birinchi yarmida ijodkorlar Nazar Eshonqulov, sharqshunos Abdumajid Azimov va Xosiyat Rustamovalar Zangiota tumanidagi 36-, 37- va 2-umumta’lim maktablarida ham ma’naviy uchrashuvlar о‘tkazishdi. Ular о‘quvchilar bilan samimiy muloqot qilib, ularni kitobxonlikka, bilim olishga, mustaqil fikrlashga da’vat etdilar. Ushbu uchrashuvlarda yozuvchilar о‘z ijodiy tajribalari, ilk ilhom manbalari va kitobning inson hayotidagi beqiyos ahamiyati haqida sо‘z yuritishdi. Ular bolalarni har kuni kamida bir necha sahifa kitob о‘qishga, fikr yuritish va savol berishdan qо‘rqmaslikka chorlashdi.

Ayni paytda Madaniyat vazirining tegishli buyrug‘iga asosan, О‘zbekiston davlat san’at va madaniyat instituti huzuridagi Pedagog kadrlarni qayta tayyorlash va ularning malakasini oshirish tarmoq markazida vazirlik tizimidagi davlat teatrlari va teatr-studiyalarida samarali faoliyat yuritib kelayotgan ijodiy xodimlar «Notiqlik san’ati» bo’yicha maxsus o’quv kurslarida malaka oshirmoqdalar.

Bugun O’zbekiston davlat san’at va madaniyat instituti rektori, professor Nodirbek Sayfullayev ushbu qisqa muddatli malaka oshirish o’quv kursi tinglovchilarining dasr jarayonlari bilan bevosita tanishdi.

Dastlab, N.Sayfullayev bugungi kunda Davlatimiz Rahbari tomonidan barcha sohalar xususan, san’at va madaniyat sohasiga berilayotgan e’tibor va g‘amxo‘rlik borasida o’z fikrini bayon etdi.

“Barchamizga ma’lumki, O‘zbekiston Respublikasi Prezidentining 2024-yil 22-noyabrdagi “Teatrlarning jamiyat madaniy hayotidagi ahamiyatini oshirish va ular faoliyatini yanada qo‘llab-quvvatlash chora-tadbirlari to‘g‘risida”gi PQ-399-son qarori qabul qilindi.

Mazkur qarorda, mamlakatimizda teatr san’atini yanada rivojlantirish, teatrlar faoliyatini takomillashtirish va ularning moddiy-texnik bazasini mustahkamlash, sohada ijodiy hamkorlik va erkinlikni ta’minlash, spektakllarning badiiy saviyasini oshirishni qo‘llab-quvvatlash, shuningdek, budjet mablag‘lari va boshqa resurslardan samarali foydalanish, sohaga jahon teatr san’atining ilg‘or tajribalari va zamonaviy texnologiyalarni joriy etish vazifalarini amalga oshirish asosiy maqsad etib belgilab olingan”. – dedi rektor.

Shuningdek, bugungi kunda institutda yosh ijodkorlarga yaratilgan sharoitlar, xususan, qabul jarayonlarining adolatli va shaffof tarzda tashkil etish uchun qilingan ishlarga ham alohida to‘xtalib o‘tdi hamda bulardan ko‘zlangan yagona maqsad kelgusida san’at va madaniyat sohasiga har tomonlama yetuk kadrlarni yetkazib berish ekanligini qayd etildi.

Bundan tashqari, Respublika teatrlariga kadr yetkazib beruvchi yetakchi oliy ta’lim muassasasi sifatida O‘zbekiston davlat san’at va madaniyat instituti barcha teatrlar bilan hamkorlikni yanada chuqurlashtirishga tayyor ekanligini ma’lum qildi.

Shundan so’ng uchrashuv ochiq muloqot shaklida davom ettirildi.

Muloqot davomida tinglovchilar o’zlari faoliyat yuritayotgan teatrlarda sahna nutqi va sahna harakati bo’yicha yuzaga kelayotgan masalalarni bildirishdi. Bu boradagi taklif va tashabbuslarini aytishdi.
O’z o’rnida N.Sayfullayev tashabbuslarni ma’qullab, bu masalalar nafaqat o’quv kursi davomida balki, teatrlarda sahnalashtirilayotgan spektakl jarayonlarida bevosita institut “Sahna nutqi” kafedrasi professor o’qituvhilaring ishtirokini yo’lga qo’yish taklifini bildirib o’tdi.
Bu esa o’z o’rnida rol ijro etayotgan aktyorlarning ovoz imkoniyatlari va sahna nutqini yanada kengaytirishda samarali bo’lishi ta’kidlandi.

Shuningdek, muloqot chog’ida Notiqlik san’ati kurslarini qamrovini yanada oshirish, ularni muntazam tashkil etish borasida ham takliflar bildirildi.

Tinglovchilar bu kurslarda ko’plab yangi bilim va ko’nikmalarga ega bo’layotganlarini, bu bilimlar kelgusi ijodiy faoliyatlarida katta ahamiyat kasb etishini aytib o’tdilar.

Mazkur dars matn ustuda ishlash moduli bo’yicha bo’lib, “Sahna nutqi” kafedrasi professor v.b. o’qituvchilari Ramz Qodirov hamda Shokir Yusupovlar tomonidan olib borildi.
Nodirbek Sayfullayev ushbu jarayonni bevosita kuzatib bordi.

Yig‘ilishda prorektorlar, rektor maslahatchisi fakultet dekanlari, bo‘lim boshliqlari hamda kafedra mudirlari ishtirok etdilar.

Dastlab, N. Sayfullayev 11-noyabr — O‘zbekiston Kasaba uyushmalari xodimlari kuni munosabati bilan so‘z yuritib, kasaba uyushmalarining jamiyatdagi o‘rni va ahamiyati xususida o’z fikr va mulohazalarini bildirdi.

U o‘z so‘zida Hurmatli Prezidentimizning 2025-yil 17-oktabr kuni O‘zbekiston Kasaba uyushmalari faollari bilan uchrashganini eslab o‘tdi.

Shuningdek, bu uchrashuv davomida Davlatimiz rahbari kasaba uyushmalari harakati a’zolariga o‘zining yuksak hurmati va ezgu tilaklarini bildirganini ta’kidladi.

N.Sayfullayev institut Kasaba uyushmasi qo‘mitasi raisi Baxtiyor Yuldashevni ushbu sana munosabati bilan institut jamoasi nomidan qizg’in tabriklab, tashakkurnoma topshirdi. Uning kelgusi faoliyatida muvaffaqiyatlar tiladi.

Taqdirlash marosimida O’zbekiston madaniyat, sport va turizm xodimlari respublika kengashining bosh mutaxassisi Umid Xalikov hamda O’zbekiston madaniyat, sport va turizm xodimlari kasaba uyushmasi Toshkent shahar birlashgan qo’mitasi raisi Muhayyo Xolboyevalar ham ishtirok etib, Baxtiyor Yuldashevga “O’zbekiston Kasaba uyushmalarining 120 yilligi” ko’krak nishonini topshirishdi.

Shundan so‘ng yig‘ilish kun tartibidagi masalalarga o‘tildi.

Kun tartibida quyidagi masalalar atroflicha muhokama qilindi:

– Institutda yoshlar bilan ishlash hamda ma’naviy-ma’rifiy sohada amalga oshirilayotgan ishlar to‘g‘risida (TTJ va ijarada yashovchi talabalar bilan ishlash);

Fakultetlar kesimida talabalarning haftalik (3-8 noyabr xolati) davomati,
2025/2026-o‘quv yili 5-kurs sirtqi ta’lim shakli talabalarining Yakuniy nazorat natijalari va 4-kurs sirtqi talabalarni o‘quv mashg‘ulotlarga jalb qilish, 2025 yil uchun rejalashtirilgan maqsadli investisiyalarni amalga oshirilishi, Xalqaro hamkorlik bo‘yicha universitetlar bilan imzolangan memorandumlar, tuzilgan (O‘zbekiston-Xitoy, O‘zbekiston-Italiya, O‘zbekiston-Turkiya, O‘zbekiston-Ozarbayjon) “Yo‘l xarita”larida belgilangan vazifalar ijrosining bajarilishi;

Kafedralarning reyting indikatorlari bo‘yicha amalga oshirilgan ishlar;
Tijoratlashtirish bo‘yicha (kafedralar kesimida) amalga oshirilgan va rejalashtirilgan ishlar;

2025/2026-yillar kuz-qish mavsumiga tayyorgarlik holati;
Ijro intizomi holati masalalari ko’rib chiqildi.

❗️Muhokamalar yakunida
har bir masala yuzasidan mas’ul shaxslarga aniq topshiriqlar berildi.

Rektor har bir yo‘nalishda belgilangan vazifalarning o‘z vaqtida va sifatli bajarilishini qat’iy nazoratga olish zarurligini ta’kidladi.

Xabaringiz bor, ayni paytda O‘zbekiston davlat san’at va madaniyat instituti rektori, professor Nodirbek Sayfullayev hamda ilmiy ishlar va innovatsiyalar bo‘yicha prorektor Baxtiyor Yoqubov Samarqand shahrida bo‘lib o‘tayotgan YUNESKO Bosh konferensiyasi 43-sessiyasida ishtirok etish maqsadida xizmat safarida bo‘lib turishibdi.

Xizmat safari davomida bugun ular Samarqand viloyati musiqali drama teatriga tashrif buyurishib, teatrning bir qator ijodkorlari bilan uchrashdilar.
Shundan so‘ng tashrifning asosiy maqsadi sifatida viloyat Madaniyat boshqarmasi boshlig‘i Botir Tugalov bilan uchrashuv o‘tkazildi.

Ma`lumki, Yurtboshimiz rahbarligida 2025-yil 8-avgust kuni o‘tkazilgan oliy ta’lim tashkilotlari bitiruvchilarining bandligini ta’minlash masalalari yuzasidan kengaytirilgan yig‘ilishda bir qator vazifalar belgilangan bo`lib, mazkur uchrashuv ayni vazifalar ijrosini ta’minlashga qaratildi.

Muloqot chog‘ida N.Sayfullayev institut faoliyati, ta’lim jarayonlari, shuningdek, dual ta’limni rivojlantirish borasida olib borilayotgan ishlar haqida so‘z yuritdi. U bitiruvchi yoshlarni o‘z mutaxassisliklari bo‘yicha ish bilan ta’minlash, ularni amaliy faoliyatga keng jalb etish hamda ta’lim jarayonini mehnat bozori talablari bilan uyg‘unlashtirish zarurligini ta’kidladi.

—Bugungi kunda mamlakatimizda Hurmatli Prezidentimiz tashabbusi bilan boshqa sohalar qatori ta’lim, madaniyat va san’at sohalarida ham keng ko‘lamli islohotlar amalga oshirilmoqda. Ushbu islohotlarning bosh maqsadi yoshlarning kasbiy salohiyatini oshirish, ularni mehnat bozorida munosib o‘rin egallashiga ko‘maklashishdan iborat”, — dedi u o‘z so‘zida.

Muzokaralar davomida hududiy madaniyat va san’at muassasalari bilan hamkorlikni yanada kuchaytirish, bitiruvchi talabalar uchun amaliy mashg‘ulot va stajirovkalarni samarali tashkil etish, nafaqat teatr san`ati sohasida balki viloyat Madaniyat boshqarmasi tasarrufidagi teatrlar, kutubxonalar muzeylar, bolalar musiqa san`at maktablari hamda madaniyat markazlarida ular uchun ish o‘rinlari yaratish borasida tashabbuslar ilgari surdi.

Shuningdek, viloyatda faoliyat yuritayotgan 4 ta teatr tarixi, uning tamal toshini qo`ygan san`at ustalari va ijodkorlar to`g`risida monografiyalar qilish, kelajakda teatr muzeyini tashkil etish bo`yicha ham muzokaralar olib borildi.

Uchrashuv davomida tomonlar o‘zaro hamkorlikda amalga oshirilishi rejalashtirilayotgan bir qator loyihalar yuzasidan fikr almashdilar.

Uchrashuv yakunida Nodirbek Sayfullayev Botir Tugalov orqali viloyatdagi barcha madaniyat muassasalarini yaqin hamkorlikka chorlab, kelgusida mamlakatimiz san’at va madaniyat sohasi uchun yuqori malakali mutaxassislar tayyorlash, yoshlar bandligini ta’minlash hamda ularning ijodiy salohiyatini ro‘yobga chiqarish yo‘lida birgalikda amaliy ishlarni bajarishga kelishib oldilar.

Bugun O‘zbekiston davlat san’at va madaniyat institutida muhim uchrashuv bo‘lib o‘tdi. Rossiya davlat teatr san’ati instituti (GITIS) rektori, professor Grigoriy Zaslavskiy, shuningdek, “Rossotrudnichestvo” agentligining O‘zbekistondagi vakolatxonasi rahbari Irina Staroselskaya hamda GITISning bir qator professor-o‘qituvchilari institutga tashrif buyurishdi.

Mehmonlarni institut Yoshlar masalalari va ma’naviy-ma’rifiy ishlar bo‘yicha birinchi prorektori Shohbek Ergashev, fakultet dekanlari hamda professor-o‘qituvchilar kutib olishdi.

Shundan so‘ng mehmonlar institut o‘quv teatriga tashrif buyurib, “Dramatik teatr va kino aktyorligi” yo‘nalishi 3-bosqich 302-guruh talabalarining “Kuyov” nomli diplomoldi spektaklining repetitsiya jarayonini kuzatishdi.

Tashrif davomida mehmonlar talabalarning ijodiy dars jarayonlari bilan ham yaqindan tanishishdi. 4-bosqich “Dramatik teatr va kino aktyorligi” yo‘nalishi talabalari tomonda ijro etilgan “Sevgi afsonasi” hamda “Estrada aktyorligi san’ati” yo‘nalishi 4-bosqich talabalari tomonidan ijro etilgan “Malikai Turandot” spektaklidan parchalar tomosha qilishdi.

Tashrif so‘ngida institut anjumanlar zalida ijodiy uchrashuv tashkil etildi. Unda institutning professor-o‘qituvchilari ishtirok etishdi.

Uchrashuv chog‘ida professor Grigoriy Zaslavskiy so‘zga chiqib, bugungi sana GITIS jamoasi uchun alohida ahamiyatga ega ekanini ta’kidladi:

— Bugun Rossiya teatr san’ati instituti — GITIS o‘zining 147 yilligini nishonlamoqda! Biz uchun bu nafaqat tarixiy sana, balki yangi ijodiy g‘oyalar, xalqaro do‘stlik va madaniy almashinuv ramzidir. O‘zbekiston davlat san’at va madaniyat instituti bilan hamkorligimiz san’at ta’limini yanada boyitish va yosh avlodni sahna san’ati ruhida tarbiyalashga xizmat qiladi,” — dedi u.

Uchrashuv iliq muloqot va o‘zaro fikr almashuvlar ruhida o‘tdi. Tomonlar kelgusida o‘zaro ta’lim, ijodiy almashinuv va qo‘shma loyihalarni amalga oshirish borasida hamkorlikni yanada kengaytirish istagini bildirishdi.

2025-yil 2-noyabr kuni Toshkent shahrida Ikkinchi O‘zbekiston–Xitoy ta’lim forumi o‘z ishini tantanali ravishda boshladi.

Tadbirning ochilish marosimida O‘zbekiston Respublikasi Oliy ta’lim, fan va innovatsiyalar vaziri Qon‘iratboy Sharipov, Xitoy Xalq Respublikasi Ta’lim vaziri Xuay Tszin‘pen, shuningdek, ikki mamlakat ta’lim sohasi vakillari ishtirok etdilar.

Forumda ta’lim tizimini raqamlashtirish, ilmiy tadqiqot natijalarini amaliyotga joriy etish, talabalar almashinuvi dasturlarini kengaytirish hamda sun’iy intellektni o‘quv jarayoniga integratsiya qilish masalalari muhokama qilindi. Shuningdek, ikki davlat o‘rtasida hamkorlikdagi yangi loyihalar va ilmiy dasturlarni amalga oshirish bo‘yicha bir qator memorandumlar imzolandi.

Mazkur nufuzli tadbirda O‘zbekiston davlat san’at va madaniyat instituti vakillari o‘quv ishlari bo‘yicha prorektor Sobir Madiev hamda Raqamli ta’lim texnologiyalari markazi rahbari Maksim Savochkinlar ham faol qatnashdi. Ular forum doirasida institutning xalqaro ta’lim aloqalarini yanada rivojlantirish borasida qator muzokaralar olib bordilar.

Tadbirning muhim natijalaridan biri — O‘zbekiston davlat san’at va madaniyat instituti bilan Xitoyning Anqing Normal University o‘rtasida hamkorlik to‘g‘risidagi memorandum imzolandi.

Anqing Normal University — Xitoyning Anhui viloyatidagi Anqing shahrida joylashgan, 1897-yilda tashkil etilgan yirik ta’lim muassasasi bo‘lib, bugungi kunda 18 ta fakultet va 69 ta bakalavr yo‘nalishida kadrlar tayyorlaydi. Universitetda ilmiy tadqiqot markazlari, xalqaro hamkorlik dasturlari va qo‘shma loyihalar faol amalga oshirilmoqda.

Imzolangan memorandum doirasida ikki oliy ta’lim muassasasi o‘rtasida talabalar va o‘qituvchilar almashinuvi, qo‘shma ilmiy tadqiqotlar, konferensiyalar hamda san’at va madaniyat sohalarida innovatsion dasturlarni yo‘lga qo‘yish rejalashtirilgan.

Umid qilamizki, bu hamkorlik O‘zbekiston va Xitoy o‘rtasidagi ta’limiy va madaniy aloqalarni yanada mustahkamlab, ikki davlat yoshlari ijodiy va ilmiy salohiyatining rivojiga xizmat qiladi.

Ma’lumki, 2023-yildan boshlab mamlakatimizda “To‘rt qalb” deb nomlangan O‘zbekistonda rus drama teatrlarining uchrashuvi o’tkaziladi.
Mazkur xalqaro loyiha “Россотрудничество”ning O‘zbekistondagi vakolatxonasi tomonidan, O‘zbekiston Respublikasi Madaniyat vazirligining tashkiliy ko‘magida amalga oshirib kelinadi.

Ushbu madaniy loyiha doirasida rus drama teatrlarining rejissyorlari va rahbarlari uchun o‘quv kurslari, rejissyorlik laboratoriyalari hamda xayriya spektakllari namoyishlari tashkil etiladi.

Shu yilning 2–8-noyabr kunlari ushbu loyiha doirasida O‘zbekistonda uchinchi bor “To‘rt qalb” nomli xalqaro uchrashuvlar o‘tkazilishi rejalashtirilgan.

Bugun poytaxtimizdagi “Holiday Inn” mehmonxonasida mazkur xalqaro loyihaning dastlabki uchrashuvi bo’lib o’tdi.

Tadbirda Rossiya teatr san’ati instituti – GITIS rektori, professor Grigoriy Zaslavskiy, “Россотрудничество”agentligining O‘zbekistondagi vakolatxonasi rahbari — Irina Staroselskaya, O‘zbekiston Respublikasi Madaniyat vazirining kotibiyat boshlig’i Ozodjon Yo’ldashev, O’zbekiston davlat san’at va madaniyat instituti rektori, professor Nodirbek Sayfullayev, O’zbekiston yoshlar teatri direktori, O’zbekiston davlat san’at va madaniyat instituti dotsenti Farhod Jo’rayev, shuningdek, O’zbekiston davlat san’at va madaniyat institutining birqator professor-o’qituvchilari, rus teatrlari rejissyor va aktyorlari, madaniyat va san’at sohasi vakillari ishtirok etishdi.

Tadbir davomida professor Nodirbek Sayfullayev Grigoriy Zaslavskiyga tashrif uchun minnatdorlik bildirar ekan, O‘zbekiston va Rossiya o‘rtasidagi madaniy-ta’limiy aloqalarning tobora mustahkamlanib borayotganini alohida ta’kidladi. Shuningdek, u GITIS va O‘zbekiston davlat san’at va madaniyat instituti o‘rtasidagi o‘zaro tajriba almashinuvi, professor-o‘qituvchilar va talabalarning ijodiy hamkorligini rivojlantirish masalalariga to‘xtalib o‘tdi.

Tadbirning eng muhim lahzalaridan biri sifatida Rossiya teatr san’ati instituti – GITIS rektori, professor Grigoriy Zaslavskiyga O‘zbekiston davlat san’at va madaniyat instituti professori faxriy unvoni hamda esdalik sovg’alari tantanali ravishda topshirildi.

Mazkur faxriy unvon O’zbekiston davlat san’at va madaniyat instituti kengashi qaroriga asosan san’at va madaniyat sohasida olib borilgan samarali ilmiy-ijodiy faoliyati, xalqaro miqyosdagi teatr san’ati rivojiga qo‘shgan hissasi hamda ikki davlat o‘rtasidagi ijodiy hamkorlikni mustahkamlashdagi xizmatlari uchun taqdim etildi.

Grigoriy Zaslavskiy o‘z minnatdorchiligini bildirib, bu e’tirofni O‘zbekiston bilan madaniy aloqalarni yanada kengaytirish yo‘lidagi mas’uliyatli ishonch deb baholadi. Shuningdek, u ikki institut o‘rtasidagi hamkorlik kelgusida ko‘plab qo‘shma ilmiy-amaliy loyihalar va ijodiy dasturlarni amalga oshirish uchun yangi imkoniyatlar yaratganini ta’kidladi.

Ma’lumot uchun:
Shu yilning 6-11-oktabr kunlari O‘zbekiston davlat san’at va madaniyat institutida GITIS (Rossiya davlat teatr san’ati instituti)ning professor-o‘qituvchilari: san’atshunoslik fanlari nomzodi, professor, Rossiya Federatsiyasida xizmat ko‘rsatgan san’at arbobi Aleksandr Barmak, Sahna plastika kafedrasi mudiri, professor, Rossiya Federatsiyasida xizmat ko‘rsatgan san’at arbobi Aydar Zakirov, Vokal san’ati kafedrasi dotsenti, Rossiya Federatsiyasida xizmat ko‘rsatgan artist Natalya Privalova hamda aktyorlik mahorati bo‘yicha katta o‘qituvchi Tatyana Morozovalar tashrif buyurib, mahorat darslarini olib borishgan edi.

Shundan so’ng teatr san’atini yanada rivojlantirish. muammo va echimlar hamda ijodiy hamkorliklar yuzasidan qizgin va samimiy suhbat olib borildi.

О‘zbekiston davlat san’at va madaniyat instituti huzuridagi Pedagog kadrlarni qayta tayyorlash va ularning malakasini oshirish tarmoq markazida madaniyat va san’at sohasi oliy ta’lim muassasalari professor-о‘qituvchilaridan iborat tinglovchilarning malakaviy attestatsiyasi o‘tkazildi.

Mazkur malakaviy attestatsiya O‘zbekiston Respublikasi Vazirlar Mahkamasining 2019-yil 23-sentabrdagi “Oliy ta’lim muassasalari rahbar va pedagog kadrlarining malakasini oshirish tizimini yanada takomillashtirish bo‘yicha qo‘shimcha chora-tadbirlar to‘g‘risida”gi 797-son qaroriga muvofiq o’tkazildi.

✅ Unda Attestatsiya komissiyasi raisi, professor Nodirbek Sayfullayev, komissiya raisi о‘rinbosari, markaz direktori Abror Porsoyev, shuningdek, komissiya a’zolari: “San’atshunoslik va madaniyatshunoslik” kafedrasi professori, Sarvinoz Qodirova, “Cholg‘u ijrochiligi” kafedrasi professori, О‘razali Toshmatov, Yunus Rajabiy nomidagi О‘zbek milliy musiqa san’ati instituti “Cholg‘u ijrochiligi” kafedrasi professori, Rifatilla Qosimov, О‘zbekiston davlat konseratoriyasi “Talim sifatini nazorat qilish bо‘lim boshlig‘i, professor, Abdupattax Abdugapparov hamda О‘zbekiston davlat xoreografiya akademiyasi “Xoreografiya jamoalari rahbari” kafedrasi dotsenti Gulshod Abdiyevalar ishtirok etdilar.

Nodirbek Sayfullayev himoya arafasida turgan pedagoglarga muvaffaqiyat tilar ekan, ularning ilmiy izlanishlari va amaliy tajribalari kelgusida ta’lim jarayonini takomillashtirishga xizmat qilishini ta’kidladi.

Shundan so`ng  Tarmoq markazida rejaga muvofiq “Vokal San’ati” va “Texnogen san’ati” yo’nalishida bir oy davomida о‘z malakalarini oshirgan jami 25 nafar tinglovchining malakaviy attestatsiya ishi komissiya a’zolari tomonidan birma-bir tinglandi.

Malakaviy himoya yakunida barcha tinglovchilar muvaffaqiyatli baholandi. Kelgusida ham izlanishlarini chuqurlashtirish, о‘z ijodiy faoliyatlarini takomillashtirish, shuningdek, san’atimiz va madaniyatimiz rivojiga munosib hissa qо‘shishlari yuzasidan tavsiya-tilaklar bildirildi.