Xabaringiz bor, shu kunlarda O‘zbekiston davlat san’at va madaniyat instituti delegatsiyasi xizmat safari bilan Koreya Respublikasida bo‘lib turibdi.

Bugun institutimiz rektori v.b. Eldor Shermanov Koreya media san’ati universitetining faxriy professori unvoni bilan taqdirlandi.

Mazkur unvon oliygohimiz rahbariyati, professor-o‘qituvchilari va talabalarining Koreya madaniyati va san’ati, shuningdek, ikki mamlakatning do‘stona aloqalarini aks ettirgan tadbirlardagi faol ishtirokiga minnatdorchilik ramzi sifatida taqdim etildi.

Shu bilan birga, institut delegatsiyasi tomonidan Media san’ati universiteti vakillariga o‘zbek to‘ni va milliy noz-ne’matlar tuhfa qilindi.

Qayd etish joiz, O‘zbekiston davlat san’at va madaniyat instituti Koreya ta’lim markazi bilan mustahkam hamkorlikni yo‘lga qo‘ygan. Oliygohimizda Koreya madaniyat markazi va koreys tili kurslari yo‘lga qo‘yilgan.

O‘zDSMI rahbariyati Koreya Respublikasiga tashrif davomida ko‘plab hamkorlik shartnomalari imzolamoqda. Buning natijasida oliygoh o‘qituvchilari va talabalari kelgusida mazkur mamlakatda bepul malaka oshirish imkoniyatiga ega bo‘ladi.

Ayni paytda Koreya Respublikasida bo‘lib turgan O‘zbekiston davlat san’at va madaniyat instituti delegatsiyasi vakillari bugun San Mun universitetiga tashrif buyurdi.

Kelishuvga ko‘ra, 2024-yil aktyorlik bo‘yicha qo‘shma ta’lim yo‘nalishi ochildi. Unda talabalar ikki yil davomida O‘zbekiston, yana ikki yil Koreya Respublikasida tahsil olish imkoniyatiga ega bo‘ladi.

Shu jumladan, San Mun universiteti tomonidan to‘rt nafar o‘zbekistonlik talaba uchun bepul turar joy hamda stipendiya ajratiladi.

Tashrif davomida institutimiz delegatsiyasi koreys ta’lim markazi vakillari bilan uchrashib, kelgusida hamkorlik asosida madaniy tadbirlar o‘tkazish, mamlakatda o‘zbek madaniyati kunlarini tashkil etish borasida kelishuvga erishildi.

San Mun xususiy universiteti 1989-yil tashkil etilgan bo‘lib, koreys tilini o‘qitish bo‘yicha mamlakatda eng yetakchi oliygohlardan biri hisoblanadi.

Ayni vaqtda Koreya Respublikasida bo‘lib turgan O‘zbekiston davlat san’at va madaniyat instituti rahbariyati bugun Sungshin universiteti axborot-resurs markazi faoliyati bilan tanishdi.

Yetti qavatdan iborat mazkur dargoh Koreyadagi eng yirik markazlardan biri bo‘lib, talabalarning dars qilishi hamda o‘z ustida ishlashi uchun barcha shart-sharoitlar yaratilgan.

Talabalarning erkin ijod qilishi va ma’lumot olishi uchun darslik va qo‘llanmalar ochiq fondda saqlanadi.

Bundan tashqari, markazda kutish zali va dam olish xonalari ham mavjud. Shuningdek, guruh bo‘lib hamda yakka tartibda ishkash uchun maxsus xonalar tashkil etilgan.

Axborot-resurs markazida zamonaviy texnikalar bilan jihozlangan bo‘lib, talabalar uchun barcha qulayliklar muhayyo qilingan.

Kelgusida oliygohimiz axborot-resurs markazini Koreya metodi asosida tizimli yo‘lga qo‘yish rejalashtirilmoqda.

Shu bilan birga, delegatsiya universitetning talabalar turar joyiga tashrif buyurib, bu yerda yoshlar uchun yaratilgan shart-sharoitlarni ko‘zdan kechirdi.

Xabaringiz bor, O‘zbekiston davlat san’at va madaniyat instituti delegatsiyasi xizmat safari bilan Koreya Respublikasida bo‘lib turibdi.

Bugun instituti rektori hamda fakultet dekanlaridan iborat delegatsiya Sungshin universitetiga tashrif buyurib, oliygoh prezidenti Son Kin Yi bilan hamkorlik doirasida amalga oshirilgan ishlarni muhokama qildi.

Muloqot davomida Koreya oliy ta’lim muassasasida amalga oshirilayotgan islohotlarni mamlakatimizda tatbiq etish, oliygohlar o‘rtasida turli loyihalarni yo‘lga qo‘yish borasida fikr almashildi. Shuningdek, istiqbolli vazifalar bo‘yicha kelishuvga erishildi. Unga ko‘ra, O‘zDSMIning yana ikki talabasi Koreyada bir semestr mobaynida bepul tahsil olish imkoniyatiga ega bo‘ladi.

Tashrif mobaynida delegatsiyamiz a’zolari mazkur oliygohda tahsil olayotgan O‘zDSMI talabasi bilan dars jarayonlari hamda talabalarga yaratilgan shart-sharoitlar borasida suhbatlashdi.

O‘zbekiston Respublikasi madaniyat vazirligi huzuridagi kinematografiya agentligi, O‘zbekiston Kinoarboblari ijodiy uyushmasi, O‘zbekiston milliy kinematografiyani rivojlantirish markazi hamda O‘zbekiston davlat san’at va madaniyat instituti, BDKI Toshkent filliali hamkorligida joriy yilning 11–22-dekabr kunlari “O‘zbek kinosi – yangi nigoh” kinooyligini doirasidagi “Debyut” talaba-yoshlar kinofestivaliga start berildi. Unda oliygohimiz yoshlari ham faol ishtirok etmoqda.

“Yangi O‘zbekiston – tinchlik, ma’rifat, taraqqiyot” shiori ostida bo‘lib o‘tayotgan ushbu festival yurtimizda yosh iste’dodli kinoijodkorlarni qo‘llab-quvvatlash, mahoratli talaba yoshlarni aniqlash, ularni rag‘batlantirish milliy kino san’ati vakillari bilan hamkorlikda kinematografiya sohasini rivojlantirish, yoshlar hamda milliy kinoindustriya vakillari bilan hamkorlikda qo‘shma kino loyihalari yaratishni kengaytirish hamda ushbu sohada ilmiy tadqiqot izlanishlarni amalga oshirish orqali soha rivoji uchun jalb etishni o‘z oldiga maqsad qilgan.

Kinofestival g‘oliblari quyidagi yo‘nalishlar bo‘yicha maxsus statuetka va esdalik sovg‘alari bilan mukofotlanadi:
1.Eng yaxshi erkak roli;
2.Eng yaxshi ayol roli;
3.Eng yaxshi ssenariy;
4.Eng yaxshi animasion film;
5.Eng yaxshi hujjatli film;
6.Eng yaxshi ovoz rejissyori;
7.Eng yaxshi operatorlik ishi;
8.Eng yaxshi rejissyorlik ishi;
9.Eng yaxshi film;
10.Eng yaxshi maqola.

“Eng yaxshi film” nominatsiyasi g‘olibi bo‘lgan ijodkorlar guruhiga 2024 yilda yaratiladigan to‘liq metrajli badiiy film uchun 500 000 000 (besh yuz million) so‘mlik;
“Eng yaxshi animasion film” nominatsiyasi g‘olibi bo‘lgan ijodkorlar guruhiga o‘n daqiqalik to‘liq metrajli animasion film ishlash uchun 300 000 000 (uch yuz million) so‘mlik;
“Eng yaxshi hujjatli film” nominatsiyasi g‘olibi bo‘lgan ijodkorlar guruhiga to‘liq metrajli hujjatli film yaratish uchun 200 000 000 (ikki yuz million) so‘mlik Davlat granti Kinematografiya agentligi tomonidan ajratiladi. Shuningdek, har bir g‘olib uchun uyali telefon hamda planshetlar sovg‘a qilinadi.

Ayni damda O‘zbekiston davlat san’at va madaniyat instituti delegatsiyasi xizmat safari bilan Koreya Respublikasida bo‘lib turibdi.

Bugun mamlakatda kino sohasiga ixtisoslashgan yetakchi oliygohlardan biri hisoblangan Chung-Ang universiteti bilan memorandum imzolandi.

Hamkorlik doirasida talabalar almashinuvi, qo‘shma ta’lim dasturlari amalga oshiriladi. Jumladan, O‘zbekiston davlat san’at va madaniyat instituti talabalari 6 oy mobaynida Chung-Ang universitetida tahsil olish imkoniyatiga ega bo‘ldi.

Shuningdek, 2024-yil O‘zDSMIda koreys oliygohi bilan hamkorlik doirasida qo‘shma ta’lim yo‘nalishi ochilishi ko‘zda tutilgan.

Bundan tashqari, kelgusida ikki oliygoh vakillari ishtirokida konferensiyalar, doktorlik dissertatsiyasi himoya ishlarini o‘tkazish masalalari muhokama qilindi.

Eslatib o‘tamiz, 1916-yil tashkil etilgan mazkur oliy ta’lim muassasasida 30 mingdan ortiq, shu jumladan, dunyoning 80 ga yaqin davlatidan 4 mingga yaqin talaba tahsil oladi. Ulardan 40 nafari o‘zbekistonlik yoshlar hisoblanadi.

Universitet QS World University ro‘yxatida eng yaxshi 500 oliygohdan biri hisoblanadi. Shuningdek, ushbu dargoh Osiyoning eng yaxshi 50 universitetidan biri sanaladi.

14 va 15-dekabr kunlari soat 14:00 da О‘zbekiston davlat san’at va madaniyat institutida 13.00.02 – Ta’lim va tarbiya nazariyasi va metodikasi ixtisosligida pedagogika fanlari bo‘yicha falsafa doktori (PhD) ilmiy darajasini olish uchun mutaxassislik va qo‘shimcha fanlardan malakaviy imtihon bо‘lib о‘tadi.

Bugun O‘zbekiston davlat san’at va madaniyat institutiga Oliy ta’lim, fan va innovatsiyalar vazirligi markaziy apparati xodimlari, Toshkent shahrida joylashgan Oliy taʼlim muassasalari rektorlari va filiallari direktorlari hamda Toshkent shahrida joylashgan Akademik litseylar va professional taʼlim muassasalari direktorlari tashrif buyurib, Oʻzbekiston Respublikasi Konstitutsiyasi qabul qilinganligining 31 yilligi munosabati bilan O‘zbekiston xalq shoiri Muhammad Yusuf dostoni asosida sahnalashtirilgan «Qora quyosh» spektaklini tomosha qilishdi.

O‘zbekiston xalq shoiri Iqbol Mirzo va Iqtidorli talabalar bilan ishlash bo‘limi boshlig‘i Shavkat Do‘stmuhammad inssenirovkasi asosida O‘zbek davlat musiqali drama teatri bosh rejissyori Doston Haqberdiyev tomonidan sahnalashtirilgan mazkur spektaklda oʻtgan asrning buyuk adiblari Choʻlpon, Abdulla Qodiriy, Usmon Nosir kabi xalqimizning vatanparvar farzandlarining vatan ozodligi yoʻlidagi mashaqqatli taqdirlaridan hikoya qilinadi.

Spektakl tomoshabinlar olqishiga sazovor bo‘ldi. Shu o‘rinda, vazirlik mutasaddilari tomonidan sahna asari uchun minnatdorchilik bildirildi hamda bosh rol ijrochisi Ulug‘bek Musinovga esdalik sovg‘asi tuhfa etildi.