Janubiy Koreya oliygohi bilan hamkorlik masalalari muhokama qilindi

O‘zbekiston davlat san’at va madaniyat instituti rektori v.b. Eldor Shermanov Janubiy Koreyaning Cha tibbiyot universiteti professori Kim Mik Yung bilan uchrashdi.

Muloqot davomida hamkorlik masalalari muhokama qilindi. Unga ko‘ra, kelgusida qo‘shma dastur asosida musiqa terapiyasi yo‘nalishini tashkil etish borasida fikr almashildi.

«Tibbiyot va san’at bir-biridan yiroq tushuncha bo‘lishi mumkin, biroq ulardagi vazifa bir-biriga juda yaqin. Tibbiyotda odamning tana a’zolariga oid kasalliklar davolansa, san’at insonning qalbiga malham bo‘ladi», — dedi Eldor Shermanov.

O‘z navbatida, koreyalik professor ham bu fikrni ma’qulladi:

«Koreyada musiqa orqali shifo ulashish usuli keng tarqalgan. Jumladan, zamonaviy 3D ko‘zoynak orqali dipressiyaga tushgan bemorlar davolanadi».

Uchrashuv so‘ngida kelgusida hamkorlik aloqalarini yo‘lga qo‘yish bo‘yicha kelishuvga erishildi. Shu bilan birga, mehmonlar uchun Muhammad Yusuf ko‘shkida folklor va etnografiya ta’lim yo‘nalishi talabalari tomonidan turli ko‘rinishlar namoyish etildi.

Grim san’ati yo‘nalishi talabalari uchun xorijlik mutaxassislar tomonidan mahorat darslari tashkil etiladi

O‘zbekiston davlat san’at va madaniyat institutining grim san’ati ta’lim yo‘nalishida tahsil olayotgan talabalar uchun Turkiya Respublikasi mutaxassislari tomonidan mahorat darslari tashkil etiladi.

Oliygoh rahbariyati mazkur sohada faoliyat olib boruvchi tashkilotning mamlakatimizdagi vakillari bilan uchrashdi.

Uchrashuvda o‘zaro hamkorlik, shu jumladan, talabalarni xorijga yuborish masalalari muhokama qilindi.

Shu bilan birga, yaqin vaqt ichida Turkiya Respublikasidan grim sohasi mutaxassislari taklif etilib, mazkur yo‘nalishda tahsil olayotgan talabalar uchun master-klass o‘tkazilishi borasida kelishuvga erishildi.

Taniqli kinorejissyor klipmeyker va operator Bahodir Yo‘ldoshev ishtirokida mahorat darsi o‘tkazildi

Kino, televideniye va radio rejissyorligi kafedrasi tashabbusi bilan O‘zbekiston davlat san’at va madaniyat institutida taniqli kinorejissyor, klipmeyker va operator Bahodir Yo‘ldoshev ishtirokida mahorat darsi o‘tkazildi.

Hozirgi kunda AQSH kinosanoati hisoblangan Hollivudda ijod qilayotgan Bahodir Yo‘ldoshev rejissyorlik, operatorlik va animatsiya yo‘nalishida tahsil olayotgan talabalari bilan o‘z bilim va ko‘nikmalarini o‘rtoqlashdi.

Qolaversa, talabalar o‘zlarini qiziqtirgan savollar yuzasidan foydali ma’lumotlarga ega bo‘lishdi.

Malaka oshirish tarmoq markazida tahsil olgan rahbarlarga sertifikat topshirildi

O‘zbekiston davlat san’at va madaniyat instituti qoshidagi Malaka oshirish tarmoq markazida qisqa muddatli malaka oshirish kurslarida tahsil olgan vazirlik tizimidagi professional ta’lim muassasalari rahbarlarini sertifikat bilan taqdirlash marosimi bo‘lib o‘tdi.

Tadbirda Madaniyat vazirining birinchi o‘rinbosari Avazxon Tadjixanov hamda institut rektori v.b. Eldor Shermanov ishtirok etdi.

«O‘ylaymanki, malaka oshirish kurslari barcha uchun foydali bo‘ldi. Bugungi kunda nafaqat mamlakatimiz, balki xorijda bilim olish uchun keng qamrovli imkoniyatlar mavjud. Bu ham davlatimiz rahbarining ta’lim sohasiga qaratayotgan e’tiboridan darak beradi. Biz imkon qadar sizlarni qo‘llab-quvvatlaymiz», — dedi vazir o‘rinbosari.

Shuningdek, O‘zDSMI rektori v.b. Eldor Shermanov Qoraqalpog‘iston Respublikasi va viloyatlardagi professional ta’lim muassasalari rahbarlari bilan o‘rnatilgan hamkorlik aloqalari to‘g‘risida fikr bildirib, bu jarayon amaliy va bardavom bo‘lishiga tilakdosh ekanligini aytdi.

Marosim so‘ngida malaka oshirish kurslarida tahsil olgan rahbarlar sertifikatlar bilan taqdirlandi. O‘z navbatida ular tomonidan vazirlik hamda institut rahbariyatiga minnatdorchilik bildirildi.

Milliy qo‘shiqchilik kafedrasi professori Ahmadjon Dadayev ijodiy kechasi o‘tkazildi

O‘zbekistonda davlat san’at va madaniyat institutida milliy qo‘shiqchilik kafedrasi professori, O‘zbekiston Respublikasida xizmat ko‘rsatgan artist, «Do‘stlik» ordeni sohibi Ahmadjon Dadayevning «O‘zbekistonim yaxshidur» deb nomlangan ijodiy kechasi o‘tkazildi.

Tadbirda institut rahbariyati, professor-о‘qituvchilar, ustoz-murabbiylar, ishchi xodimlar, mehmonlar, talabalar ishtirok etdi.

Bayramona konsert dasturi san’atkorning yaqinlari, shogird-u muxlislari, oliygohda tahsil olayotgan ijodkor yoshlarga katta quvonch bag‘ishladi.

Ijodiy kecha davomida qayd etilganidek, musiqa insonda yuksak didni shakllantirishga xizmat qiladi va unga ma’naviy ozuqa beradi. Kishi ruhiyatiga kuchli ta’sir ko‘rsatib, nafosat olamiga olib kiradi.

Ahmadjon Dadayev an’anaviy mumtoz musiqa merosi, maqom ijrochilik san’ati sirlarini qunt bilan o‘zlashtirgan ijodkordir. Ustoz tomonidan yaratilgan asarlar zamonaviy ijrochilik amaliyotida keng ommalashgan, deyish mumkin.

Uzoq yillardan buyon musiqa san’ati sohasida mehnat qilayotgan mamlakatimizning madaniyati hamda sanʼati taraqqiyotiga munosib hissa qo‘shib kelayotgan, ko‘plab san’atkorlarning ustozi bo‘lgan Аhmadjon Dadayev o‘z kasbiga va talabalariga mehr qo‘ygan, yuksak madaniyatli, keng dunyoqarashga ega bo‘lgan shaxs ekanligini e’tirof etish joizdir.

Tadbirda jonli tarzda ijro etilgan kuy-qo‘shiqlar barchaga ko‘tarinki kayfiyat bag‘ishladi.

Rektor va yoshlar uchrashuvi o‘tkazildi

O‘zbekiston davlat san’at va madaniyat instituti rektori v.b. Eldor Shermanov kino, televideniye va radio san’ati fakulteti talabalari bilan uchrashib, ochiq muloqot o‘tkazdi.

Uchrashuv talabalarning bo‘sh vaqtlarini mazmunli o‘tkazishlari, darslar davomida olgan bilimlarini doimiy tarzda mustahkamlab borish yetuk mutaxassis bo‘lib yetishishlarida muhim ahamiyatga ega ekanligi, qo‘shimcha mashg‘ulotlar uchun institutda yaratilgan sharoitlar haqida suhbat o‘tkazildi.

Shuningdek, mamlakatimizda yoshlarni qoʻllab-quvvatlash, ayniqsa, oliy oʻquv yurtlari bitiruvchilari bandligini taʼminlash, yosh mutaxassislarning samarali faoliyat olib borishlari uchun zarur shart-sharoitlar yaratish boʻyicha keng koʻlamli ishlar olib borilayotgani, bu borada institutda ham ko‘plab ishlar amalga oshirilayotgani alohida qayd etildi.

Rektor talabalarga axborot texnologiyalaridan foydalanish ko‘nikmasiga ega bo‘lishi muhim ekanligi, yetarli darajadagi xorijiy til bilish sertifikatiga erishish orqali qo‘shimcha stipendiya olishlari mumkinligi haqida ham aytib o‘tdi. Bundan tashqari, xorijiy tillarni o‘rganish, xalqaro miqyosda bilimlarini mustahkamlash, malaka oshirish imkonini yaratishi yuzasidan tavsiyalar berildi.

Hozirgi kunda institutning qator xorijiy oliy ta’lim muassasalari bilan hamkorligi yo‘lga qo‘yilganligi va bu orqali o‘qituvchilar hamda talabalarning xorijda o‘z bilim va malakalarini oshirish imkoniyatini yaratishi haqida so‘z yuritdi.

Uchrashuv davomida internetdan to‘g‘ri foydalanish, axborot hujumlaridan ehtiyot bo‘lish lozimligi aytib o‘tildi. Shu bilan birga, ijtimoiy tarmoqlardan unumli foydalanish ishonchli va rasmiy bo‘lmagan sahifalarni kuzatishda ogoh bo‘lish, turli yolg‘on hamda aldovlarga ishonib qolmaslik muhimligi ta’kidlandi.

Qolaversa, talabalar o‘zlarini qiziqtirgan savollar yuzasidan tegishli ma’lumotlarga ega bo‘lishdi.

O‘zDSMIda Dilorom Muhammedova sinf konserti o‘tkazildi

O‘zbekiston davlat san’at va madaniyat institutida folklor va etnografiya fakulteti dotsenti Dilorom Muhammedovaning «Dilga yaqin qo‘shiqlar» deb nomlangan sinf konserti bo‘lib o‘tdi.

Tadbir avvalida institut rektori v.b. Eldor Shermanov mumtoz va xalq qo‘shiqlarning inson hayotida tutgan o‘rni to‘g‘risida fikr yuritib, Dilorom Muhammedovaga samimiy minnatdorchiligini bildirdi.

«Xalq qo‘shiqlari bolalik davrimizdagi unutilmas va go‘zal xotiralarining bir bo‘lagi desam, mubolag‘a bo‘lmaydi. Ayniqsa, biz tengi avlod buni juda yaxshi biladi. Ustoz ijodkorlar hamda iqtidorli talabalar tomonidan ijro etiladigan mumtoz va xalq qo‘shiqlarini tinglab, ma’naviy ozuqaga ega bo‘lamiz. Dilorom Muhammedova va uning shogirdlarini bugungi sinf konserti bilan chin qalbimdan muborakbod etaman hamda ularning ilmiy-ijodiy faoliyatida muvaffaqiyat tilayman», — dedi rektor.

Konsert davomida «Farg‘ona ruboiysi», «Qizgina», «Bo‘ylaringga», «Andijon boray dedim», «Namangan tanovari», «Bog‘ishamol», «Buxoro termalari» kabi mumtoz va xalq qo‘shiqlari ijro etilib, tomoshabinlar olqishiga sazovor bo‘ldi.

Tadbirda Bobur Xadjimuratov boshchiligidagi «E’zoz» ansambli jo‘rnavozlik qildi. Qolaversa, O‘zbekiston xalq artisti Zamira Suyunova mehmon sifatida ishtirok etdi.

O‘zDSMI hamda Respublika ixtisoslashtirilgan musiqa va san’at maktablari o‘rtasida memorandum imzolandi

Bugun O‘zbekiston davlat san’at va madaniyat instituti rahbariyati Qoraqalpog‘iston Respublikasi va viloyatlarda joylashgan ixtisoslashtirilgan musiqa va san’at maktablarining direktorlari bilan memorandum imzoladi.

Oliygoh rektori v.b. Eldor Shermanov hamkorlikdan mamnun ekanligini bildirib, ilmga chanqoq yoshlarni ta’lim muassasasiga chorlashga tayyor ekanligini bildirdi:

«O‘zaro hamkorlik aloqalarimiz rivoj topib borayotganidan mamnunman. Bizning maqsadimiz oliygohimizda mamlakatizning barcha hududidan iste’dodli yoshlarni qamrab olish olish hamda ularni sohamiz rivoni yo‘lida xizmat qiladigan yetuk kadrlar etib tayyorlashdan iborat hisoblanadi. Bundan tashqari, hamkorligimiz aholi orasida madaniyat va san’atimiz targ‘iboti uchun ham muhim ahamiyatga ega».

Memorandum asosida hududlarda institutda faoliyat olib borayotgan taniqli va el suygan san’at vakillari ishtirokida ijodiy uchrashuvlar tashkil etiladigan bo‘ldi.