E’LON

2026-YIL 2-APREL KUNI SOAT 11.00 DA O‘ZBEKISTON DAVLAT SAN’AT VA MADANIYAT INSTITUTI HUZURIDAGI ILMIY DARAJA BERUVCHI

PhD.11/2025.27.12.San.02.01 RAQAMLI ILMIY KENGASH ASOSIDAGI BIR MARTALIK ILMIY KENGASH MAJLISI BO‘LIB O‘TADI

 KUN TARTIBI:

Inatullayev Ma‘rufjon Nodirjon o‘g‘lining 13.00.02 – Ta’lim va tarbiya nazariyasi va metodikasi (musiqa ta’limi) ixtisosligi bo‘yicha “Boshlang‘ich sinf maktab
musiqa darsliklarini brayl yozuvida yaratish texnologiyalarining zamonaviy
innovatsion metodlari” mavzusidagi pedagogika fanlari bo‘yicha falsafa doktori (PhD) ilmiy darajasini olish uchun taqdim etilgan dissertatsiyasi muhokamasi.

Majlis O‘zbekiston davlat san’at va madaniyat instituti “A” binosi,

2-qavat, majlislar zalida 11.00 da boshlanadi.

 Dissertatsiya qo‘lyozmasi bilan O‘zbekiston davlat san’at va madaniyat instituti Axborot-resurs markazida tanishish mumkin.

Joriy yilning 24-fevral kuni Hurmatli Prezidentimiz Shavkat Mirziyoyev boshchiligida yoshlar bilan o‘tkazilgan ochiq va samimiy muloqot mamlakatimiz taraqqiyotida mutlaqo yangi bosqichni boshlab berayotgan tarixiy voqea bo‘ldi, desak mubolag‘a bo‘lmaydi.

Unda ilgari surilgan tashabbuslar – ta’lim, kasb-hunar, tadbirkorlik, innovatsiya va volontyorlik yo‘nalishlaridagi aniq va tizimli qarorlar – 22 milliondan ortiq yoshlarimizning ulkan salohiyatini ro‘yobga chiqarishga xizmat qiladi.

Davlatimiz Rahbari yoshlar – bu nafaqat demografik ustunlik, balki iqtisodiy, ijtimoiy va ma’naviy taraqqiyotning bosh omili ekanligiga alohida e’tibor qaratdi. Ayniqsa, jahon olimpiadalaridagi yutuqlar, TOP universitetlarda tahsil olayotgan o‘g‘il-qizlarimiz, xalqaro bozorga chiqqan startaplar va sport sohasidagi g‘alabalar – bularning barchasi yurtimizda yaratilgan imkoniyatlar samarasidir.

O‘zbekiston davlat san’at va madaniyat instituti jamoasi ushbu ishonch va e’tiborni yuksak mas’uliyat sifatida qabul qiladi.

Biz uchun yoshlarning nafaqat kasbiy, balki ma’naviy-estetik tafakkurini shakllantirish, ularni milliy va umuminsoniy qadriyatlarga hurmat ruhida tarbiyalash ustuvor vazifadir.

Prezidentimiz tomonidan ilgari surilgan “Kelajak tadbirkori” dasturi, “Yangi avlod tadbirkorlari” tashabbusi, “Yoshlar biznes inkubatori” markazlari, “Oʻsish va rivojlanish (Upshift)” loyihasi, volontyorlik harakatini keng qo‘llab-quvvatlash kabi tashabbuslar ta’lim muassasalari oldiga ham yangi vazifalarni qo‘ymoqda.

O‘zbekiston davlat san’at va madaniyat instituti jamoasi ham ushbu tashabbuslarni ijrosini ta’minlashni, shubhasiz, eng ustubor vazifa etib belgiladi.

Shu boisdan ham kelgusida talabalarni amaliy loyihalar asosida o‘qitish, kreativ industriyalar, madaniy menejment va san’at tadbirkorligi yo‘nalishlarini kuchaytirish, dual ta’lim elementlarini keng joriy etish, yosh ijodkorlar va startap tashabbuskorlarini qo‘llab-quvvatlash bo‘yicha aniq chora-tadbirlar ishlab chiqish va amalga oshirishni reja qildik.

Ta’kidlash o’rinliki, institutimiz kafedralarining ish beruvchi tashkilotlarda ayni paytda 4 ta filiali faoliyat olib bormoqda. Bu ishlarni davom ettirish hamda bu asosda dual ta’limni kengatirishni maqsad qilganmiz.

Shuningdek, 4 ta sport federatsiyalari bilan hamkorlik shartnomalari imzolangan bo‘lib, hamkorlikda bir qancha sport va ma’naviy-ma’rifiy tadbirlar tashkil etib kelinmoqda.

Endilikda bu ishlarni ham salmog‘ini oshirish, shuningdek, institutda sport musobaqalarini yanada ko’paytirish borasida ish olib borilmoqda.

Bitiruvchilarni ish bilan ta’minlash borasida ham madaniyat boshqarmalari, teatrlar, kutubxonalar bilan muntazam uchrashuvlar o‘tkazib kelmoqdamiz.

Ayni paytda, olib borilayotgan mazkur ishlar bizdan yanada katta mas’uliyat va tizimli yondashuvni talab etayotganini chuqur anglaymiz.

Hurmatli Prezidentimiz Shavkat Mirziyoyev tomonidan amalga oshirilayotgan keng ko‘lamli islohotlar ta’lim va madaniyat sohasida ham yangicha fikrlash, zamonaviy boshqaruv usullarini joriy etish hamda natijadorlikni ustuvor mezon sifatida belgilash zarurligini ko‘rsatmoqda.
Bu esa bizdan eskicha qarash va qoliplangan yondashuvlardan voz kechib, faoliyatimizni zamon talablari asosida qayta ko‘rib chiqishni, har bir tashabbusni aniq amaliy samaraga yo‘naltirishni taqozo etadi.

Shunday ekan, oldimizda turgan vazifalarni tanqidiy tahlil asosida qayta baholab, yanada yuqori bosqichga olib chiqish ustuvor maqsadimizdir.

Negaki, oliy ta’lim muassasalari oldida ham ko’plab yangi vazifalar turibdi. Xususan, bugun ular faqat bilim beruvchi muassasa emas, balki innovatsiya, tadbirkorlik va yangi ish o‘rinlari yaratuvchi markazga aylanishi lozimligi belgilandi.

Biz ishonamizki, san’at va madaniyat sohasi yoshlar uchun nafaqat ijod maydoni, balki iqtisodiy barqarorlik va innovatsion rivojlanishning muhim drayveriga aylanadi.

Yangi avlod san’atkorlari, menejerlari va ijodiy tadbirkorlari mamlakatimizning xalqaro nufuzini yanada yuksaltiradi.

Prezidentimizning yoshlar bilan muloqoti – bu shunchaki uchrashuv emas, balki har bir rahbar, har bir pedagog va har bir mas’ul shaxs zimmasiga yuklangan aniq vazifa va javobgarlikdir.

Biz ham kelgusi faoliyatimizda, albatta, yoshlarimizni eshitamiz, qo‘llab-quvvatlaymiz va ularning tashabbuslari ro‘yobga chiqishi uchun barcha imkoniyatlarni safarbar etamiz.

Yoshlar – Yangi O‘zbekistonning buguni va kelajagidir.
Ularning muvaffaqiyati – Vatanimiz muvaffaqiyatidir.

Nodirbek Sayfullaev,
O‘zbekiston davlat san’at
va madaniyat instituti rektori,
professor.

E’LON

2026-YIL 5-MART KUNI SOAT 14.00 DA O‘ZBEKISTON DAVLAT SAN’AT VA MADANIYAT INSTITUTI HUZURIDAGI ILMIY DARAJA BERUVCHI PhD.11/2025.27.12.San.02.01 RAQAMLI ILMIY KENGASH

MAJLISI BO‘LIB O‘TADI

KUN TARTIBI:

1. Ibragimov Bobir Mansurovichning 13.00.02 – Ta’lim va tarbiya nazariyasi va metodikasi (musiqa ta’limi) ixtisosligi bo‘yicha “Kompyuter dasturlari vositasida bo‘lajak musiqa o‘qituvchilarining kasbiy malakalarini takomillashtirish metodikasi” mavzusidagi pedagogika fanlari bo‘yicha falsafa doktori (PhD) ilmiy darajasini olish uchun taqdim etilgan dissertatsiyasi muhokamasi.

Majlis O‘zbekiston davlat san’at va madaniyat instituti “A” binosi,

2-qavat, majlislar zalida 14.00 da boshlanadi.

Dissertatsiya qo‘lyozmasi bilan O‘zbekiston davlat san’at va madaniyat instituti

Axborot-resurs markazida tanishish mumkin.

O‘zbekiston davlat san’at va madaniyat institutida “Estrada va ommaviy tomoshalar san’ati” kafedrasi tomonidan “Yangi davr estrada san’ati: ma’naviy, badiiy, ta’limiy kontekstda” mavzusida respublika ilmiy-amaliy anjumani bo‘lib o‘tdi.

Yangi O‘zbekistonning madaniy taraqqiyotida estrada san’atining ma’naviy, badiiy va ta’limiy aspektlarini tadqiq va tahlil etish, estrada aktyorligi san’ati, ommaviy bayram va tomoshalar rejissurasi bo‘yicha yuqori malakali kadrlar tayyorlash jarayonini tubdan isloh etishga qaratilgan nazariy va amaliy tavsiyalar ishlab chiqish, fan, ta’lim va ishlab chiqarish o‘rtasida ilmiy-ijodiy hamkorlikni mustahkamlash anjumanning asosiy maqsadi bo‘ldi.

Anjumanda soha mutaxassislari: poytaxt teatrlari direktorlari va bosh rejissyorlari, televideniye rejissyorlari, professor-o‘qituvchilar, tadqiqotchilar, magistr va iqtidorli talabalar bilan birgalikda Respublikadagi madaniyat va san’atga ixtisoslashgan ta’lim muassasasalari direktorlari, shuningdek, pedagoglari faol ishtirok etdi.

Dastlab, anjumanni institut rektori, professor Nodirbek Sayfullayev kirish so‘zi bilan ochib, Yangi O‘zbekiston ma’naviy-madaniy qiyofasini shakllantirishda san’at, xususan estrada san’ati va ommaviy bayram, tomoshalarning tutgan o‘rni, sohadagi yutuqlar va mavjud kamchiliklar, mazkur kamchiliklarni bartaraf etish yuzasidan ta’lim muassasalari hamda ijodiy ishlab chiqarish tashkilotlari bilan mustahkam integratsiyani yo‘lga qo‘yish masalalariga alohida e’tibor qaratdi va anjuman ishiga omad tiladi.

Konferensiya yalpi majlisida san’atshunoslik fanlari doktori, professor Muhabbat Tulyaxodjayevaning “Zamonaviy estrada san’atining badiiy-estetik ahamiyati, televizion kliplardagi zamonaviy tendensiyalar, yutuq va kamchiliklar” mavzusidagi, professor Jahongir Mamatqosimovning zamonaviy ommaviy bayramlar rejissurasidagi innovatsion texnologiyalarning qo‘llanilishi, soha bo‘yicha kadrlar tayyorlash holati, fan, ta’lim va ishlab chiqarish o‘rtasida mustahkam integratsiyani o‘rnatish, kadrlar tayyorlashdagi mavjud muammolar va yechimlar” mavzusidagi, “OXUS Culture” tashkiloti rahbari Husniddin Atoning “Ommaviy bayram va tomoshalar hamda xalqaro festivallarni tashkil etish yuzasidan xorijiy tajribalar” mavzusidagi, professor v.b. Ramz Qodirovning “Aktyorlik san’ati ixtisosliklarida sahna nutqini o‘qitish spetsifikasi, xususan estrada aktyorlarining sahnaviy nutqini rivojlantirishning spetsifik asoslari” mavzusidagi, “Rapid Company” rahbari, rejissyor, klipmeyker Rauf Nabiyevning “Zamonaviy media olamda sun’iy intellektdan foydalanishning ahamiyati va bu borada O‘zbekiston sharoitida olib borilayotgan ishlar” mavzusidagi, Madaniyatshunoslik va nomoddiy madaniy meros ilmiy tadqiqot instituti katta ilmiy xodimi, sanatshunoslik fanlari boyicha falsafa doktori (PhD) Charos Raximova «Milliy o‘zlikni anglashda estrada san‘atining ahamiyati» mavzusidagi, shuningdek, San‘atshunoslik fanlari nomzodi, professor Lola Gʻaniyevaning “Yangi davr estrada san‘atida ijrochilik masalalari” mavzusidagi ma’ruzalari tinglandi.

Har bir ma’ruza anjuman ishtirokchilari tomonidan qizg‘in qabul qilindi va bahs-munozaralarga boy bo‘ldi.

Shundan so‘ng anjuman “Estrada san’ati dolzarb masalalari: an’anaviylik va zamonaviylik kontekstida” va “Estrada san’atida kadrlar tayyorlashning dolzarb masalalari” mavzularida ikki sho‘bada o‘z ishini davom ettirdi.

Unda sohaning rivojlanishiga qaratilgan 50 dan ortiq ma’ruza tinglandi. “Estrada va ommaviy tomoshalar san’ati” kafedrasi tomonidan olib borilayotgan o‘quv-metodik, ilmiy-tadqiqot, ma’naviy-ma’rifiy ishlar hamda xalqaro hamkorlikda amalga oshirilayotgan ishlar yuzasidan taqdimot bilan tanishtirildi.

Konferensiyaning ilmiy-amaliy jihatlarini e’tiborga olib konfrensiya ishtirokchilari uchun “Estrada aktyorligi san’ati” 3-kurs talabalari ishtirokida professor Temur Rashidov tomonidan sahnalashtirilgan “Kuz” spektakli namoyish etildi. Spektakl muhokamasida uning yuksak badiiy saviyada va aynan estrada teatri spetsifikasiga mos sahnalashtirilganligi ta’kidlandi.

Anjuman yakuniga ko‘ra: estrada san’atining ijtimoiy hayotimizdagi madaniy ahamiyati tahlil qilinib, istiqbolli rejalar ishlab chiqildi. Estrada aktyorlik san’ati va ommaviy bayram va tomoshalar rejissyorlarini tayyorlashning dolzarb masalalari tahlil qilindi. Ommaviy bayram va tomoshalarni tashkil etish va o‘tkazish yuzasidan jahon tajribasi tahlil qilindi, professor-o‘qituvchilarning rivojlangan davlatlarda malakasini oshirish yuzasidan taklif va tavsiyalar berildi.
Tadbir so’ngida qatnashchilarga sertifikatlar topshirildi.

O’zbekiston davlat san’at va madaniyat instituti tomonidan «San’atshunoslik va madaniyatshunoslikning dolzarb masalalari: muammo va yechimlar» mavzusida xalqaro ilmiy-nazariy anjuman bo‘lib o‘tdi.

«Renessans» kino uyida tashkil etilgan mazkur anjumanda yurtimiz va jahon darajasidagi nufuzli mutaxassislar o’z ma’ruzalari bilan ishtriok etdilar.

Anjuman doirasida tashkil etilgan yalpi majlisni institut rektori, professor Nodirbek Sayfullayev kirish so‘zi bilan ochar ekan, jumladan shunday dedi: — Barchangizni ushbu nufuzli ilmiy anjumanda ko‘rib turganimdan bag‘oyatda mamnunman. Globallashuv va integratsiya shiddat bilan kechayotgan bugungi davrda milliy madaniyatni zamonaviy jarayonlarga moslashtirish, uni xalqaro miqyosda tanitish va rivojlantirish davlatimiz siyosatining ustuvor yo‘nalishiga aylangan. Prezidentimiz tashabbuslari asosida qabul qilinayotgan strategiyalar, davlat dasturlari va huquqiy hujjatlar soha rivojini yangi bosqichga olib chiqmoqda.

San’atshunoslik va madaniyatshunoslik fanida dolzarb masalalar chuqur o‘rganilmoqda, ilmiy tahlil, bahs va munozaralar, yangi nazariy qarashlar shakllanmoqda. Shu jihatdan, “San’atshunoslik va madaniyatshunoslikning dolzarb masalalari: muammo va yechimlar” mavzusidagi xalqaro ilmiy-nazariy anjuman nafaqat muammolarni muhokama qilish, balki ularning yechimlari bo‘yicha ilmiy asoslangan taklif va tashabbuslar ilgari surish uchun keng maydon vazifasini bajaradi deb ishonch bildiramiz.

Shundan so‘ng O‘zbekiston Respublikasi Madaniyat vaziri o‘rinbosari Murodjon Majidov hamda Kinematografiya agentligi Bosh direktori Shuxratilla Rizayevlar so‘zga chiqib, anjuman ishiga muvaffaqiyat tiladi. Ular o‘z nutqlarida mazkur tadbirning ahamiyatiga alohida to‘xtalib, bugungi kunda mamlakatimizda madaniyat va san’at sohalarini rivojlantirish, ijodkor yoshlarni qo‘llab-quvvatlash hamda xalqaro hamkorlikni kengaytirish borasida amalga oshirilayotgan islohotlarni e’tirof etdilar. Videoaloqa orqali konferensiya ishtirokchilariga tabrik so‘zi bilan Tyantszin musiqa konservatoriyasi prezidenti janob Vang Xonvey murojaat qildi.

Shuningdek yalpi majlisda Ozarbayjon davlat madaniyat va san’at universiteti rektori, professor Jeyran MAHMUDOVAning “Ozarbayjonda madaniy ta’limning dolzarb masalalari”, Qozon davlat madaniyat instituti rektori, professor Roza AXMADIYEVAning “Rossiya xalqlari etnomadaniy an’analarini aktuallashtirish”, Oltoy davlat madaniyat instituti rektori, professor Olesya KUTKINAning “Badiiy ta’lim tashkilotlari va madaniyat muassasalarining kasbiy hamkorligi davlatning ijtimoiy-madaniy sohasini rivojlantirish sifatida”, Sungkyul universiteti professori JIN-HVAN RAning “Ijtimoiy uygʻunlik sari: oʻzgalar qarashlarini jamiyat fikr-mulohazalariga singdirish”, Oʻzbekiston davlat san’at va madaniyat instituti professori Muhabbat TULYAXODJAYEVAning “Soʻzlovchi mizansahnalar: rejissura san’atida asarning gʻoyaviy-tematik mazmuni ifodasi sifatida”, Oʻzbekiston davlat san’at va madaniyat instituti professori Abduxalil MAVRULOVlarning“ Oʻzbekiston tarixi – madaniyat tarixi” nomli ma’ruzalari tinglandi. Yalpi majlis so’ngida ma’ruzachilar sertefikat va esdalik sovg’alari bilan taqdirlandilar.

Anjuman “San’atshunoslikning dolzarb masalalari: an’anaviylik va zamonaviylik” hamda “Ijtimoiy-madaniy faoliyatda integratsion va transformatsion jarayonlar” nomli sho‘balarda davom ettirilib, 40 ga yaqin ma’ruzalar tinglandi.

Konferensiya ma’ruzalari to‘plam sifatida nashr etildi.

Xitoy bilan hamkorlikning yangi bosqichlari O‘zbekiston davlat san‘at va madaniyat instituti ilmiy ishlar va innovatsiyalar bo‘yicha prorektor Baxtiyor Yakubov hamda institut Raqamli ta’lim texnologiyalari markazi direktori Maksim Savochkinlar shu yilning 19–20 sentabr kunlari Xitoy Xalq Respublikasi Chanchung shahridagi “Szilin” xalqaro ta’lim universitetida bo‘lib o‘tgan konferensiyada ishtirok etishdi.

Universitet prezidenti xonum Sin He bilan kechgan samimiy muloqot chog’ida prorektor Baxtiyor Yakubov taklif uchun minnatdorchilik bildirar ekan, О‘zbekiston davlat san’at va madaniyat instituti rektori professor Nodirbek Sayfullayevning mazkur universitetning 30 yillik yubileyi munosabati bilan bildirgan tabrigini yetkazdi.

Xonum Sin He tashrif uchun о‘zining cheksiz minnatdorligini aytarkan, ushbu uchrashuv ikkala oliygoh o‘rtasida samarali hamkorlikning yangi bosqichlari bo‘lishiga ishonch bildirdi.
Shundan so‘ng Szilin Xalqaro Ta’lim Universiteti Xalqaro San’at Akademiyasi tashabbusi bilan Akademiya direktori Van Szyanxuey, prorektorlar Go Tinszyun va Van Chjo hamda professor-o‘qituvchilar jamoasi ishtirokida Xitoy va O‘zbekiston o‘rtasida san’at ta’limi sohasida hamkorlikka bag‘ishlangan davra suhbati bo‘lib o‘tdi. Bu uchrashuv universitet yubileyi tadbirlarining muhim qismi bo‘lish bilan birga, san’at ta’limi yo‘nalishida ikki tomonlama hamkorlikni yanada chuqurlashtirish va madaniy almashinuvni rag‘batlantirish uchun imkoniyat bo‘ldi.

Suhbat davomida Van Szyanxuey O‘zbekistonlik mehmonlarni samimiy qutlab, universitetning 30 yil davomida til ta’limi, san’at yo‘nalishlari va xalqaro hamkorlikda erishgan asosiy yutuqlari haqida ma’lumot berdi. U Xalqaro San’at Akademiyasi «san’at + xorijiy til + raqamli texnologiya» integratsiya modeli asosida innovatsion rivojlanishga alohida e’tibor qaratganini ta’kidladi va mazkur uchrashuv qo‘shma rivojlanishning yangi yo‘llarini izlashda muhim qadam bo‘lishiga umid bildirdi.

O‘z navbatida, prorektor Baxtiyor Yakubov O‘zbekiston davlat san’at va madaniyat institutining tarixi va o‘ziga xos ta’lim yo‘nalishlari haqida so‘zlab berdi. Ikki mamlakat o‘rtasida san’at ta’limi, ilmiy-tadqiqot hamkorligi va talabalar almashinuvini yanada rivojlantirish istagini bildirdi.

Muloqot jarayonida tomonlar kurslar yaratish, professor-o‘qituvchi va talabalar almashinuvi, san’at ko‘rgazmalari hamda ilmiy hamkorlik kabi yo‘nalishlarda istiqbolli hamkorlik masalalarini muhokama qildilar. «2+2» ikki diplomli bakalavriat, «2+3» bakalavriat–magistratura hamkorlik dasturlari, shuningdek, xalqaro yozgi maktab loyihalari ilgari surildi. Ishtirokchilar mazkur uchrashuv Xitoy va O‘zbekiston o‘rtasida san’at ta’limi sohasida «yagona taqdir hamjamiyati»ni barpo etish yo‘lida muhim bosqich ekanini ta’kidlab, ikki mamlakat yosh avlodlari uchun yangi imkoniyatlar yaratishga xizmat qilishini qayd etdilar.

Shundan sо‘ng uzoq muddatli do‘stlik va hamkorlik timsoli sifatida tomonlar bir-birlariga madaniy ramziy to‘hfalar topshirishdi. Rasmiy qismdan so‘ng mehmonlar universitet kutubxonasi, xalqaro ta’lim Markazi va «Global qishloq» amaliy ta’lim bazasi bilan tanishdilar. Shuningdek, ular universitetning ilmiy yutuqlari va ta’lim imkoniyatlari, talabalar tomonidan tayyorlangan amaliy san’at asarlari ko‘rgazmasi, universitet yubileyiga bag‘ishlangan ekspozitsiyalar hamda Szilin viloyati madaniyati va turmush tarzi bilan yaqindan tanishish imkoniga ega bo‘lishdi.

Ishtirokchilar universitetning 30 yillik rivojlanish yo‘lida erishgan natijalarini, uning madaniy muloqotni rivojlantirishga qo‘shgan hissasini, xalqaro mutaxassislar tayyorlashdagi tajribasini va «Bir kamar – bir yo‘l» tashabbusini qo‘llab-quvvatlashdagi faolligini yuqori baholadilar.

Xizmat safarinig ikkinchi kuni Xitoy va xorijiy davlatlar universitetlari prezidentlari konferensiyasi bo‘lib o‘tdi. Unda ta’lim, ilm-fan va innovatsiya sohalarida xalqaro hamkorlikni rivojlantirishning strategik yo‘nalishlari muhokama qilindi.

Ishtirokchilar ta’lim dasturlarini amalga oshirish, ta’lim jarayonini raqamlashtirish va qo‘shma ilmiy loyihalarni rivojlantirish bo‘yicha o‘z tajribalari bilan o‘rtoqlashdilar. Konferensiyada xalqaro hamkorlik zamonaviy ta’lim makonini shakllantirishda, globallashuv sharoitida samarali faoliyat ko‘rsata oladigan yangi avlod mutaxassislarini tayyorlashda hal qiluvchi ahamiyatga ega ekani ta’kidlandi.

О‘zbekiston davlat san’at va madaniyat instituti vakillarining Szilin Xalqaro Ta’lim Universitetiga bо‘lgan safari ikki tomonlama munosabatlar rivojlanishida yangi bosqich boshlanishini tasdiqladi. Erishilgan kelishuvlar va belgilangan loyihalar akademik va madaniy hamkorlikni kengaytirish, shuningdek, O‘zbekiston va Xitoy o‘rtasidagi do‘stlikni mustahkamlash uchun mustahkam asos yaratib berdi.

“Hurriyat gazetasining 2024-yil 18-sentabr chorshanba kuni nashrdan chiqqan 37 (1412)-sonida Madaniyatshunoslik va nomoddiy madaniy meros ilmiy tadqiqot instituti ilmiy xodimi Alisher Shukurovning «Nahotki “madaniyat”da madaniyatshunoslik о‘qitilmasa?» sarlavhali maqolasi e’lon qilingan edi.

Ma’lumki, O‘zbekiston davlat san’at va madaniyat institutida 2024-2025-о‘quv yilida Bakalavriat ta’lim yо‘nalishi va magistratura mutaxassisligi bо‘yicha о‘quv rejalar hamda fan dasturlari 2024-yil 30 avgust 1-sonli institut Kengashi tomonidan tasdiqlangan. Jumladan “Madaniyatshunoslik” fani barcha 4-kurs kunduzgi ta’lim yо‘nalishlarida aks ettirilgan. bundan tashqari institutda «San’atshunoslik va madaniyatshunoslik» kafedrasi faoliyat olib bormoqda.70211802-Madaniyatshunoslik bо‘yicha magistratura mutaxassisigi mavjud bо‘lib bakalvriat bosqichida esa 60211800- “Madaniyatshunoslik” ta’lim yo‘nalishi Institutning Nukus filialida mavjud.