O‘zbekiston davlat san’at va madaniyat institutida Xotira va qadrlash kuniga bag‘ishlangan tadbir o‘tkazildi.

Teatr san’ati hamda Kino, televideniye va radio san’ati fakultetlari hamkorligida o‘tkazilgan tadbirda kafedra o‘qituvchilari hamda oliygohning iqtidorli talabalari o‘z chiqishlari bilan tomoshabinlar e’tirofiga sazovor bo‘ldi.

Avvalroq 9-may — Xotira va qadrlash kuni munosabati bilan O‘zbekiston davlat san’at va madaniyat instituti jamoasi xotira maydoniga tashrif buyurib, vatan tinchligi va kelajak avlodning nurli istiqboli yo‘lida jon fido qilgan qahramonlar jasorati va porloq xotirasiga hurmat bajo keltirgani haqida xabar berilgandi.

O‘zbekiston davlat san’at va madaniyat institutida Yoshlar bilan ishlash, ma’naviy va ma’rifat bo‘limi hamda Yoshlar ittifoqi boshlang‘ich tashkiloti tomonidan “Zakovat” intellektual o‘yinining may oyidagi 1-tur bellashuvi o‘tkazildi.

Unda to‘rtta fakultetdan to‘rtta jamoa ishtirok etdi.

Amaldagi g‘olib — Kino, televideniye va radio san’ati fakulteti hamon yetakchilikni hech kimga bermayapti.

Bugun O‘zbekiston davlat san’at va madaniyat instituti hamda Turkiyaning Kojaeli universiteti rahbariyati uchrashdi.

Tomonlar ta’lim va fan sohasida do‘stona munosabat va hamkorlikni mustahkamlash borasida kelishuvga erishdi.

Hamkorlik doirasida o‘qituvchi va tadqiqotchilar almashinuvi, qo‘shma ilmiy loyihalar, jumladan, konferetsiya, uchrashuv, seminarlar tashkil etish kabi vazifalar bajarilishi belgilandi.

Shuningdek, o‘quv, ilmiy va uslubiy adabiyotlar almashinuvini yo‘lga qo‘yish, birgalikda tadbirlar tashkil etish, ta’lim va ilmiy-tadqiqot bo‘yicha tajriba almashish masalalari muhokama qilindi.

Muzokara so‘ngida ikki oliy ta’lim muassasasi o‘rtasida yuqorida ta’kidlangan vazifalarni o‘z ichiga olgan hamkorlik memorandumi imzolandi.

Xabaringiz bor, 6-8-may kunlari Sirdaryo viloyatining Guliston shahrida xalqaro baxshichilik san’ati festivali o‘tkaziladi.

Ayni vaqtda O‘zbekiston davlat san’at va madaniyat instituti rektori v.b. Eldor Shermanov Sirdaryo viloyatiga tashrif buyurib, mazkur festivalga tayyorgarlik jarayoni bilan bevosita tanishmoqda.

Eslatib o‘tamiz, festivalga 1500 nafardan ortiq ijodkor jalb etilgan. Shu bilan birga, 40 dan ortiq xorijiy davlat va xalqaro tashkilotdan baxshichilik san’atiga doir 30 nafardan ziyod musiqa ijrochi ishtirok etadi.

Anjuman yakunida ko‘rik-tanlov g‘oliblari va sovrindorlarini tantanali taqdirlash marosimi hamda gala-konsert namoyish etiladi.

Xalqaro festival g‘olib ishtirokchilarini rag‘batlantirish maqsadida esa bu gal ham AQSH dollarida pul mukofotlari ajratilgan bo‘lib, Gran pri sohibiga 7000 AQSH dollari, 2 ta yo‘nalishdagi 1-o‘rin sohibi uchun 10.000 AQSH dollari, 3-o‘rin egalariga 3.500 AQSH dollari ajratilgan.

Shuningdek, eng yaxshi selfi, fleshmob kabi yo‘nalishlaridagi xalqaro festivalning eng yaxshi targ‘ibotchisi bo‘lgan matbuot xodimlari ham pul mukofoti bilan taqdirlanishi kutilmoqda.

Bugun O‘zbekiston davlat san’at va madaniyat instituti axborot-resurs markazida Iqtidorli talabalarning ilmiy tadqiqot faoliyatini tashkil etish bo‘limi tomonidan Ilmiy jurnallarda maqola chop etish bo‘yicha trening bo‘lib o‘tdi.

Mazkur seminarda soha mutaxassislari, respublika tanlovlari g‘olib va sovrindorlari hamda ilmiy maqolalari ko‘pgina xorijiy jurnallarda chop etilgan iqtidorli talabalar tomonidan ilmiy maqola tasnifi, yozish uslubi, xalqaro elektron jurnallardan to‘g‘ri foydalanish, yuqori reytingga ega jurnallarda maqola chop etish borasidagi fikrlari bilan o‘rtoqlashdi.

Trening davomida talabalar o‘zlarini qiziqtirgan savollarga javob olishdi.

Bugun O‘zbekiston davlat san’at va madaniyat instituti rahbariyati oliygohning magistratura mutaxassisligida tahsil olayotgan talabalar bilan uchrashdi.

Institut rektori v.b. Eldor Shermanov bo‘lajak magistrlarning ilmiy ishlarga chuqur yondashishi, bu borada rahbariyat tomonidan barcha shart-sharoit yaratilishi ta’kidlandi.

“Magistratura talabasi o‘qishni boshlaganidayoq ilmiy ishini belgilab olishi hamda unga jiddiy yondashib, kelgusida soha rivojiga hissa qo‘sha oladigan bilim qoldirishi lozim. Oliygohimizda ko‘plab magistratura mutaxassisligini tugatgan talabalar faoliyat olib bormoqda. Chunki, yoshlar har qanday dargohga yangi nafas, yangi bilim va ko‘nikmalarni olib kiradi. Bu esa rivojlanish uchun xizmat qiladi”, dedi institut rektori v.b. Eldor Shermanov.

Shu bilan birga, Ilmiy ishlar va innovatsiyalar bo’yicha prorektor Sobir Jumayev tomonidan talabalarning chet tili darajasini oshirish masalasi ilgari surildi. Bu borada institutda xorijiy til kurslari tashkil etilishi qayd etildi.

Qolaversa, yangilanayotgan Konstitutsiya bo‘yicha o‘tkaziladigan referendum mohiyati tushuntirib o‘tildi.

Davra suhbati tarzida o‘tgan uchrashuvda talabalarning taklif va muammolari tinglandi hamda ularga yechim topish borasida vazifalar belgilab olindi.

O‘zbekiston Respublikasi Prezidentining maqomi

O‘zbekiston Respublikasi Prezidentining maqomi O‘zbekiston Respublikasi Konstitutsiyasining XIX bobida belgilab berilgan 

O‘zbekiston Respublikasining Prezidenti:

1) fuqarolarning huquqlari va erkinliklariga, O‘zbekiston Respublikasining Konstitutsiyasi va qonunlariga rioya etilishining kafilidir;

2) O‘zbekiston Respublikasining suvereniteti, xavfsizligi va hududiy yaxlitligini muhofaza etish, milliy-davlat tuzilishi masalalariga doir qarorlarni amalga oshirish yuzasidan zarur chora-tadbirlar ko‘radi;

3) mamlakat ichkarisida va xalqaro munosabatlarda O‘zbekiston Respublikasi nomidan ish ko‘radi;

4) muzokaralar olib boradi hamda O‘zbekiston Respublikasining shartnoma va bitimlarini imzolaydi, respublika tomonidan tuzilgan shartnomalarga, bitimlarga va uning qabul qilingan majburiyatlariga rioya etilishini ta’minlaydi;

5) o‘z huzurida akkreditatsiyadan o‘tgan diplomatik hamda boshqa vakillarning ishonch va chaqiruv yorliqlarini qabul qiladi;

6) O‘zbekiston Respublikasining chet davlatlardagi diplomatik va boshqa vakillarini tayinlash uchun nomzodlarni O‘zbekiston Respublikasi Oliy Majlisining Senatiga taqdim etadi;

7) O‘zbekiston Respublikasi Oliy Majlisiga mamlakat ichki va tashqi siyosatini amalga oshirishning eng muhim masalalari yuzasidan murojaat qilish huquqiga ega;

8) respublika oliy hokimiyat va boshqaruv organlarining bahamjihat ishlashini ta’minlaydi; vazirliklar, davlat qo‘mitalari hamda davlat boshqaruvining boshqa organlarini O‘zbekiston Respublikasi Vazirlar Mahkamasining taqdimiga binoan tuzadi va tugatadi, shu masalalarga doir farmonlarni keyinchalik O‘zbekiston Respublikasi Oliy Majlisining palatalari tasdig‘iga kiritadi;

9) Senat Raisi lavozimiga saylash uchun nomzodni O‘zbekiston Respublikasi Oliy Majlisining Senatiga taqdim etadi;

10) O‘zbekiston Respublikasi Oliy Majlisining palatalari ko‘rib chiqishi va tasdiqlashi uchun O‘zbekiston Respublikasi Bosh vaziri nomzodini taqdim etadi hamda uni iste’foga chiqqanda, Bosh vazirga nisbatan bildirilgan ishonchsizlik votumi O‘zbekiston Respublikasi Oliy Majlisining palatalari tomonidan qabul qilinganda yoxud qonunda nazarda tutilgan boshqa hollarda lavozimidan ozod qiladi;

11) O‘zbekiston Respublikasi Bosh vazirining O‘zbekiston Respublikasi Oliy Majlisining Qonunchilik palatasi ma’qullaganidan keyin kiritilgan taqdimiga binoan O‘zbekiston Respublikasi Vazirlar Mahkamasi a’zolarini tasdiqlaydi va lavozimlaridan ozod qiladi;

12) O‘zbekiston Respublikasi Bosh prokurori va Hisob palatasi raisini tayinlaydi va ularni lavozimidan ozod qiladi, keyinchalik bu masalalarni O‘zbekiston Respublikasi Oliy Majlisining Senati tasdig‘iga kiritadi;

13) O‘zbekiston Respublikasi Oliy Majlisining Senatiga O‘zbekiston Respublikasi Konstitutsiyaviy sudi, O‘zbekiston Respublikasi Oliy sudi tarkiblariga, shuningdek O‘zbekiston Respublikasi Sudyalar oliy kengashining raisi, O‘zbekiston Respublikasi Markaziy banki Boshqaruvining raisi lavozimlariga nomzodlarni taqdim etadi;

14) O‘zbekiston Respublikasi Sudyalar oliy kengashining taqdimiga binoan viloyatlar va Toshkent shahar sudlari raislari va rais o‘rinbosarlarini, O‘zbekiston Respublikasi Harbiy sudi raisini tayinlaydi va lavozimlaridan ozod etadi; O‘zbekiston Respublikasi Sudyalar oliy kengashining a’zolarini qonunga muvofiq tasdiqlaydi;

15) O‘zbekiston Respublikasi Bosh vazirining taqdimiga binoan viloyatlar hokimlarini hamda Toshkent shahar hokimini qonunga muvofiq tayinlaydi hamda lavozimidan ozod etadi. Konstitutsiyani, qonunlarni buzgan yoki o‘z sha’ni va qadr-qimmatiga dog‘ tushiradigan xatti-harakat sodir etgan tuman va shahar hokimlarini Prezident o‘z qarori bilan lavozimidan ozod etishga haqli;

16) respublika davlat boshqaruvi organlarining va hokimlarning qabul qilgan hujjatlarini ular qonunchilik normalariga nomuvofiq bo‘lgan hollarda to‘xtatadi, bekor qiladi; O‘zbekiston Respublikasi Vazirlar Mahkamasi majlislarida raislik qilishga haqli;

17) O‘zbekiston Respublikasining qonunlarini imzolaydi va e’lon qiladi; qonunga o‘z e’tirozlarini ilova etib, uni takroran muhokama qilish va ovozga qo‘yish uchun O‘zbekiston Respublikasi Oliy Majlisiga qaytarishga haqli;

18) O‘zbekiston Respublikasiga hujum qilinganda yoki tajovuzdan bir-birini mudofaa qilish yuzasidan tuzilgan shartnoma majburiyatlarini bajarish zaruriyati tug‘ilganda urush holati e’lon qiladi va qabul qilgan qarorini uch kun ichida O‘zbekiston Respublikasi Oliy Majlisi palatalarining tasdig‘iga kiritadi;

19) favqulodda vaziyatlar (real tashqi xavf, ommaviy tartibsizliklar, yirik halokat, tabiiy ofat, epidemiyalar) yuz bergan taqdirda fuqarolarning xavfsizligini ta’minlashni ko‘zlab, O‘zbekiston Respublikasining butun hududida yoki uning ayrim joylarida favqulodda holat joriy etadi va qabul qilgan qarorini uch kun ichida O‘zbekiston Respublikasi Oliy Majlisining palatalari tasdig‘iga kiritadi. Favqulodda holat joriy etish shartlari va tartibi qonun bilan belgilanadi;

20) O‘zbekiston Respublikasi Qurolli Kuchlarining Oliy Bosh qo‘mondoni hisoblanadi, Qurolli Kuchlarning oliy qo‘mondonlarini tayinlaydi va vazifasidan ozod qiladi, oliy harbiy unvonlar beradi;

21) O‘zbekiston Respublikasining ordenlari, medallari va yorlig‘i bilan mukofotlaydi, O‘zbekiston Respublikasining malakaviy va faxriy unvonlarini beradi;

22) O‘zbekiston Respublikasining fuqaroligiga va siyosiy boshpana berishga oid masalalarni hal etadi;

23) amnistiya to‘g‘risidagi hujjatlarni qabul qilish haqida O‘zbekiston Respublikasi Oliy Majlisining Senatiga taqdimnoma kiritadi va O‘zbekiston Respublikasining sudlari tomonidan hukm qilingan shaxslarni afv etadi;

24) Davlat xavfsizlik xizmati raisini tayinlaydi va lavozimidan ozod etadi, keyinchalik shu masalalarga doir farmonlarni O‘zbekiston Respublikasi Oliy Majlisining Senati tasdig‘iga kiritadi;

25) ushbu Konstitutsiya va O‘zbekiston Respublikasining qonunlarida nazarda tutilgan boshqa vakolatlarni amalga oshiradi.

Prezident o‘z vakolatlarini bajarishni davlat idoralariga yoki mansabdor shaxslarga topshirishga haqli emas.